Embaixadór TL ba RI: Bruno akuzadu viola kódigu penal Indonézia

Embaixadór Timor-Leste (TL) ba Repúblika Indonézia (RI), Alberto Carlos, informa, autór sira ne’ebé deskonfia produs osan dolar falsu nomeadamente Bruno Maglhães, akuzadu viola kódigu penal Indonézia ligadu ho burla.  

“Iha Tersa feira dia 10 de Marsu tinan 2020 ha’u hamutuk ho adidu seguransa Komisáriu Julio Hornay halo vizita ida ba Polda Metro Jaya, hodi buka hatene klean liu tan kona-ba kazu ne’ebé akontese iha Jakarta ne’ebé envolve sidadaun Timor-Leste balun, e entre sira nomeadamente Señor Bruno Magalhães, ekipa Polísia Investigasaun Kriminal konfirma katak, iha duni sidadaun Timor-Leste balun detidu iha sela POLDA Metro Jaya hodi submete ba prosesu investigasaun. Sidadaun ne’e akuzadu viola kódigu penal Indonezia nian relasiona ba burla. Ekipa Polísia Investigasaun Kriminal POLDA Metro Jaya mos fasilita ami nain rua hodi bele hasoru malu ho suspeitu sira”,dehan Embaixadór TL ba Indonézia, Alberto Carlos, foin lalais Iha Jakarta, Indonézia.

Alberto Carlos, akresenta katak, embaixada Timor-Leste prontu estende apoiu legal no asisténsia legal ba autor sira, maibe detidu balun hatete katak la presiza.

“Ami nia intensaun fó hatene ba sira katak embaixada  prontu estende apoiu legal no asisténsia legal, maibe Sr. Bruno fó hatene katak, temporariamente nia la presiza. Nia mos fó hatene katak, nia kondisaun diak, nia agradese tebes ba polísia Indonézia ne’ebé trata sira ho didiak. Sr. Bruno mos voluntariamente hato’o ba embaixadór TL ho sr. adidu seguransa katak, buat sira ne’ebé nia halo ne’e hodi nia naran rasik, hodi nia kompañia nia naran, la lori ema seluk nia naran ainda mais ho naran líder sira ita nian iha Timor-Leste laiha nai ulun ida mak haruka nia atu halo buat sira ne’e”,dehan embaixadór TL ba Indonézia, Alberto Carlos iha Jakarta.GMN