Governu hasai rezolusaun, bandu sidadaun husi nasaun tolu tama TL

Governu liu husi Konsellu Ministru aprova ona rezolusaun medida temporaria hodi bandu sidadaun husi nasaun tolu mak hanesan Xina, Itália no Iraun, tama Timor-Leste (TL), relasiona ho Corona Virus Disease (COVID-19) ne’ebé oras ne’e mundu tomak preokupadu.

Proposta rezolusaun ne’e aprezenta husi, Ministru Negósiu Estranjeiru no Kooperasaun (MNEK), Dionísio Babo.

Iha entrevista, Ministru Estadu Prezidénsia Konsellu Ministrus, Agio Pereira, afirma, Konsellu Ministru (KM), aprova projetu rezolusaun ne’ebé propoin medida temporaria, hodi bandu sidadaun husi Xina, Itália nomos Iraun, tama Timor-Leste (TL).

“MNEK aprezenta proposta rezolusaun governu, fó kontinuasaun ba rezolusaun ne’ebé aprova ona, hodi kontrola perigu ka situasaun relasaun ho COVID-19, rezolusaun ida ne’e propoin kontinuasaun medida temporaria, interdisaun no bandu sidadaun husi Repúblika Popular Xina, Repúblika Italiano no Repúblika Islámiku Iraun, tama mai Timor-Leste, tamba rai tolu ne’e ohin loron afeta maka’as COVID19”,hateten, Ministru Estadu Prezidénsia Konsellu Ministrus, Agio Pereira, iha Palásiu Governu, Kuarta (11/03/2020).

Agio Pereira hatutan, Konsellu Ministru (KM), aprova fó restrisaun halo revizaun durante loron 15, hodi haree situasaun ne’e envolve oinsa.

“KM rona atualizasaun ida husi Ministériu Saúde (MS), kona-ba preparasaun ne’ebé ita iha hodi kontrola COVID-19 iha ita-nia rai, atu hasa’e kapasidade kontrolu iha teritóriu tomak, MS servisu ho komisaun interministerial, ne’ebé KM mak kria iha semana liu ba”, haktuir, Agio.

Governante ne’e esplika, iha aprezentasaun ne’e kobre área hanesan, fahe informasaun ba públiku, fatin ne’ebé atu akolla ema ne’ebé sai vítima ba COVID-19, prosesu toma desizaun atu organiza  ema hirak ne’ebé hetan síntomas.

Maibé seidauk grave, no ema sira afetadu maibé grave, medida ne’e MS ho liña ministeriál defini ona, hodi hasa’e preparasaun TL nian liga ba perigu husi COVID-19.

“MS aprezenta mós pontu situasaun kona-bá preparasaun fatin 3, izolamentu, karantina no tratamentu, protokolu hodi haruka amostra husi pasiente sira ne’ebé suspeita ona COVID-19”, haktuir, Agio.Cin