PN la kria lalais lei proteje líder nasionál, Lere: Ami sei kaer ema lori ba Tribunal

Xefi Estadu Maior Jeneral F-FDTL, Majór Jeneral Lere Anan Timur, husu ba Parlamentu Nasionál (PN) atu kria  lalais lei ruma hodi proteje líder nasionál no orgaun sobarania sira husi ema deskoñesidu ne’ebé defama ka trata  líder sira ne’e iha média sosial. No kuandu la kria lalais lei mak parte F-FDTL sei toma inisiativa kaer ema lori ba Tribunal.

“Ita haree ba facebook,  ema deskoñesidu  trata ita-nia líder sira ate orgaun  soberanu sira ne’e, tanba ne’e ha’u husu parlamentu atu halo lei ida lalais, atu proteje ita-nia órgaun soberanu sira, ita dehan katak, iha lei ne’eba hatete,  iha direitu liberdade ne’e ema hotu tenke respeita, ema ida la bele viola, mas ikus-ikus ha’u haree iha facebook, trata ita-nia Prezidente da Repúblika,  no ita-nia líder nasional sira ne’e, ida ne’e ita la bele admite”, dehan Majór Jeneral Lere Anan Timur ba Jornalista sira Kuarta (11/03/2020), iha Palásiu Prezidensial Nicolau Lobato, Bairo Píte Díli.

Tuir Lere maske lei laiha, maibé  etika tenke iha, no tenke respeita órgaun soberanu, ko’alia kona-bá patriotizmu, nasionalizmu signifika, respeitu ba órgaun soberanu sira ne’e, no respeitu ba simbolu nasionál sira ne’e, Prezidente  Repúblika nu’udar simbolu ba nasaun, Xefe ba  nasaun, ne’e mak Parlamentu tenke halo lei ida para proteje órgaun soberania sira.

“Se lae, ha’u bele toma inisiativa kaer ema ne’ebé defama trata ita-nia líder sira, entrega ba tribunal, entrega ba juiz sira imi julga ida ne’e ka la julga, ita tenke halo hanesan ne’e, la’os Timor ne’e demokrasia  liberdade  para halo ida-idak ninian, Timor atu ba ne’ebé? Timor nasaun ki’ik ida, populasaun iha deit un millaun ital, nusa mak ita labele kontrola ita-nia ema sira ne’e, no eduka ita-nia ema sira ne’e atu sai sidadaun diak ba nasaun”, tenik Lere.oly