Durante implementasaun EE, Ema na’in 39 tama illegal mai Timor-Leste

Diretór Jerál Servisu Migrasaun, Superintendente Agustinho Gomes, informa, durante Governu implementa Estadu Emerjénsia, ema na’in 39 mak tam ilegalmente liu husi fronteira terrestre no entre na’in 39 ne’e, inklui sidadaun Indonézia na’in ida (1).

“Ema sira ne’ebé tama illegal liu husi área fronteira Mota-Ain na’in 16, Salele 9, Bobo-Meto Oesilo 10, Sakato 4, inklui sidadaun Indonézia ne’ebé terdampar ou laloran mak lori ema ne’e tama ita-nia área”, Diretór Jerál Servisu Migrasaun ne’e ba jornalista sira iha edifísiu Ministériu Interiór (MI), Villa-Verde-Díli, Kuarta (15-04-2020).

Agostinho relata, ema na’in 39 ne’e kaptura hahú husi Unidade Polísia Fronteira (UPF), iha loron 27, fulan Marsu, to’o Kuarta semana ne’e, no sidadaun sira ne’e entrega ba ekipa saúde hodi halo ezaminasaun COVID-19 hafoin entrega ba Polísia Migrasaun, hodi loke prosesu investigasaun no kontinua entrega ba Ministériu Saúde (MS) atu lori ema sira ba tau iha kuarentena.

Enkuantu bazeia ba dekretu governu númeru 3/2020, efetuadu pelu dekretu Prezidente ho tan despaixu MI númeru 19/2020 bandu sidadaun ne’ebé de’it, inklui Timor-Oan labele tama teritóriu Timor-Leste no autoriza tránzitu merkadória iha zona internasionál kada loron Kuarta. avi