Halo kontaktu ho ema iha sintoma COVID-19, Membru PNTL ida submete ba kuarentena

Komandante Jerál (KomJer) Polísia Nasionál Timor-Leste (PNTL), Komisáriu Faustino da Costa, hateten, membru polísia ida (1) dau-daun ne’e iha hela kuarentena, tanba durante ne’e fó seguransa ba sidadaun ne’ebé iha kuarentena no izolamentu no mós halo kontaktu ho ema ne’ebé deskonfia hetan sintoma Corona Virus Disease 2019 (COVID-19).

“Ha’u dehan hanesan ne’e, ita-nia membru balun ne’ebé durante ne’e fó seguransa iha kuarentena liu husi buat ida naran teste, foti sampel rezultadu hatudu katak sira sei di’ak hela, maske ita fó ona auto kuarentena 14 dias ba sira, iha insidente ida que akontese no ohin loron ami halo mak ami-nia membru ida tama ba kuarentena, ema ne’ebé pozitivu depois polísia halo seguransa ne’e seidauk hetan informasaun, ema sira ne’ebé lori ne’e mós la fó informasaun katak ema ne’e hanesan ne’e, ikus mai tanba polísia hapara, tanba nia mak halo seguransa iha ne’ebá, nia hapara ema ne’e no ema ne’e hatun vidru ko’alia direta ho nia, entaun ami ko’alia di-di’ak no ami nia membru ne’e agora iha kuarentena, ita la’ós ko’alia deskonfia, tanba de’it prosesu ida lori ita-nia maluk sira ne’e, entaun ikus mai iha situasaun balun ne’ebé ami ko’alia para lori membru ne’e ba kuarentena”, KomJer PNTL ne’e ba jornalista sira hafoin remata serimónia toma de pose ba superior polísia na’in nen (6), iha Kuartel Jerál PNTL, Caicoli-Díli, Tersa (21-04-2020).

Entretantu KomJer PNTL ne’e mós afirma, membru polísia ne’ebé durante ne’e fó seguransa ba fatin kuarentena no izolamentu, parte komandu jerál mós aplika auto kuarentena ba sira.san