Kazu krime menus durante Estadu Emerjénsia

Segundu Komandante Polísia Nasionál Timor-Leste (PNTL), Superintendente Euclides Belo, informa, durante Estadu Emerjénsia (EE) kazu krime iha Díli laran hahú menus, tanba komunidade barak mak fila ona ba sira-nia munisípiu no hirak ne’ebé hela iha Díli mantein kumpre regras EE ni’an.

Maibé antes ne’e, kazu tentativa omisídiu no krime sira seluk sempre akontese iha kapitál Díli.

“Atu dehan wainhira Prezidente Repúblika (PR) dekreta EE, númeru krime ne’e menus, bele mós ita-nia komunidade barak mak halo desklokasaun ba munisípiu, ami espera katak, EE ne’e bele eduka ema, para ema labele komete iha krime, tanba ita hotu konsentra hamutuk iha hanoin lolo-liman ba malu no hamutuk halo prevensaun”, Segundu Komandante PNTL munisípiu Díli ne’e ba jornalista sira iha resintu sede suku Comoro, Tersa (14-04-2020).

Euclides akresenta, PR dekreta EE hodi limite ema nia movimentu iha fatin públiku sira, kazu halo krime mós hahú redus, tanba ema barak desloka ba munisípiu no hela hakmatek iha uma.

Kona-bá total númeru kazu krime ne’ebé mak akontese, Segundu Komandante PNTL munisípiu Díli ne’e la esplika, tanba seidauk haree iha sistema IMS.

Entretantu PR, Francisco Guterres “Lú Olo” dekreta EE iha loron 28, fulan Marsu, tinan ne’e, hodi limite komunidade atu movimenta ba fatin públiku sira, hodi prevene propagasaun coronavirus (COVID-19). avi