PCIC identifika ona autór ne’ebé lansa informasaun kona-bá máskara iha MedSos

Relasiona ho publikasaun ne’ebé espalla iha Média Sosiál (MedSos) katak, deskonfia Xineza balun iha kapitál Díli fa’an máskara ne’ebé rega ona ho substánsia balun deskonfia coronavirus (COVID-19).

Ho nune’e, ekipa Jestaun Krize orienta kedas Polícia Científica e de Investigação Criminal (PCIC), identifika kedas autór ne’ebé lansa informasaun falsu iha MedSos ne’e.

Maibé, Adjuntu Diretór PCIC, Adino Cabral, relata, ekipa PCIC identifika ona autór refere, maibé autór prinsipál ne’ebé lansa informasaun falsu ne’e servisu hela iha Austrália.

“Ita identifika duni individu refere, ita mós simu informasaun balun husi Ekipa Jestaun Krize para atu lokaliza to’ok identidade Falsu (ID) refere no entantu ohin ita-nia ekipa lokaliza no identifika duni nia, individa ne’e feto ida iha Gleno ho individu ida iha Austrália, maibé Timor-Oan, entaun ita identifika uluk feto ne’e no nia fó informasaun no ekipa halo kedas video call ho individu refere ne’ebé publika sai duni informasaun ida ne’e no informasaun ne’e mós nia rona laiha verasidade no fim nia hakerek nia publika sai iha pájina facebook no hamosu preokupasaun no trankuilidade iha ita-nia sosiedade. ohin abrevasaun polisiál ne’e katak informasaun ne’e falsu, tanba informasaun ne’ebé ema ne’e publika ne’e mós rona tutan husi ema seluk no Xineza sira ne’ebé ohin ita lori mai para halo investigasaun ne’e sira mós rejeita totalmente”, Adjuntu Diretór PCIC ne’e liu husi konferensia imprensa ne’ebé hala’o iha edifísiu PCIC Caicoli-Díli, Kuarta Semana kotuk ne’e.

Entretantu autór prinsipal ne’ebé lansa informasaun falsu ne’e liu husi video call ho PCIC, autór ne’e rekoñese informasaun ne’e nia mak publika duni no autór prinsipál ne’e ho naran inisiál EDSB, nu’udár Timor-Oan ne’ebé servisu iha Austrália.

Husi sorin seluk, na’in ba loja refere mós rejeita informasaun ne’ebé publika iha MedSos ne’e, tanba informasaun ne’e laloos. san

Leave a Reply

Your email address will not be published. Required fields are marked *