JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Kazu baku KPK iha Manleuana, MP husu TDD kondena arguidu sira ho pena multa

Kazu baku KPK iha Manleuana, MP husu TDD kondena arguidu sira ho pena multa

Tribunál Distritál Díli (TDD), iha Kinta, loron 7, fulan ne’e, kontinua alegasaun ikus husi Ministériu Públiku (MP) ba kazu Ofensas Integridade Fízika Simples (OIFS), ne’ebé deskonfia komete husi arguidu ho inisiál EPS, SSP no CJMG hasoru lezadu Miguel Martins nu’udár membru Konsellu Polisiamentu Komunitaria (KPK), iha suku Manleuana.

Iha alegasaun finál ne’e, MP reprezenta husi prokuradór, António Tavarez husu tribunál atu aplika pena multa ba arguidu na’in tolu (3) atu selu indeminizasaun ba lezadu, tanba konsekuénsia husi sira-nia hahalok ne’e halo lezadu lakon aktividade negósiu, hanesan fa’an ai-maran.

“Husu juíz atu kondena arguidu na’in 3, hodi selu multa ba lezadu, nune’e bele kumpre sira-nia sala”, prokuradór refere iha sala julgamentu TDD-Mandarin.

Alegasaun ne’e MP bazeia ba produsaun provas ne’ebé antes ne’e arguidu, lezadu no sasin sira deklara ona iha tribunál, tanba MP haree katak hahalok arguidu sira-nia ne’e impede no haterus ema seluk nia vida.

Nune’e mós arguidu sira konfesa integralmente ba faktus ne’ebé sira komete.

Maibé Defensór Públiku (DP), Sergio Quintas nia alegasaun, husu tribunál atu tetu di-di’ak produsaun provas ne’ebé produs ona iha prosesu julgamentu bai-bain, molok foti desizaun.

“Husu ba tribunál atu tetu di-di’ak ba deklarasaun arguidu, lezadu no sasin sira-ni’an molok foti desizaun”, dehan DP ne’e.

Hafoin rona tiha alegasaun husi MP no DP, tribunál adia fali julgamentu ne’e ba loron 21, fulan Maiu, tinan 2020, hodi rona desizaun.

Tuir kronolojia, kazu ne’e akontese iha loron 18/09/2019 mais ou menus tuku 17:00, wainhira realiza jogu futebol ida iha kampu Madrid, iha área Lesibutak-Manleuana.

Iha jogu refere, lezadu Miguel Martins nu’udár membru KPK fó seguransa ba jogu refere.

Lee hotu :   Ema deskoñesidu tuda Bis diresaun Díli - Lospalos

Bainhira jogu remata, lezadu sa’e nia motor atu fila ba uma, maibé to’o dalan klaran arguidu EPS hamutuk ho arguidu na’in rua seluk ho motór hala’i uluk tiha lezadu, nune’e arguidu EPS ho arguidu rua seluk hein fali lezadu iha dalan klaran, bainhira lezadu tuir sira, arguidu EPS kaer ai-pedasuk ida hodi hapara lezadu.

Bainhira lezadu para motor, arguidu EPS baku no fai lezadu nia liman, kanuruk, kanotak no kotuk laran to’o lezadu monu husi motor leten.

Nune’e arguidu SSP lori fatuk tuda kona lezadu nia liman no hakilar ba lezadu katak “oho tiha-oho tiha”.

Konsekuénsia husi arguidu sira-nia hahalok ne’e, rezulta lezadu Miguel Martins sofre kanek no bubu iha isin lolon.

Ho nune’e, MP akuza arguidu sira ho krime OIFS, ne’ebé previstu iha artigu 145, alinea 1 no konjuga ho artigu 32 kódigu penál Timor-Leste.

Julgamentu ne’e, prezide husi juíz sigular, Ivan Suritay, MP reprezenta husi prokuradór, António Tavarez no arguidu sira hetan asisténsia legál husi DP, Sérgio Quintas. san

 

Add to Comments Here!!!!

error: Content is protected.
Secured By miniOrange
You might also like:
PD husu ba ukun na’in sira respeita konstituisaun ■Apoia ba kualker Governu

Prezidente Partidu Demokrátiku (PD), Mariano Asanami...

PM Taur aprezenta lista membru Governu ba PR Lú Olo

Primeiru Ministru (PM), Taur Matan Ruak...

PPN Arão: Uluk PPN Aniceto la ajenda karta destituisaun mos la viola lei

Prezidente Parlamentu Nasional (PPN), Arão Noe...

Close