Kazu omisídiu iha aldeia Efaca, Reitor UNPAZ husu deskulpa ba família

Reitor Universidade da Paz (UNPAZ), Adolmando Amaral, husu deskulpa ba família matebian Henrique Maia Soares, relasionadu ho nia deklarasaun iha públiku.

Kazu omisídiu rezulta joven ida mate iha rezidénsia Universidade da Paz (UNPAZ), iha Domingu (21/06/20), ne’ebé família matebian deskonfia estudante estajiáriu UNPAZ balun mak halo planu hodi oho Henrique Soares Maia.

Reitor UNPAZ  antes ne’e mós deklara iha públiku, vítima Herique Maia Soares ba halo asaltu estudante sira hafoin monu husi uma andar leten mai rai, hafoin rezulta mate. Maibé família matebian deskorda informasaun Reitor nian ne’e.

Iha  Tersa  (23/06/20)  liu husi konferénsia imperensa Reitór UNPAZ Adolmando Amaral husu diskulpa ba  família matebian.

“Em prinsipiu Universidade nafatin apoiu  família matebian para depois hamutuk ho família matebiain lori matebian ba  halot, prosesu tomak tuir dalan legal,  tanba kazu ne’e entrega tiha ona ba iha PNTL munisípiu Díli, prosesu ne’e hahú la’o ona, autór sira  detein ona iha sela detensaun.  Agora Universidade atu mai halo esklaresimentu  de’it ba informasaun ne’ebé mak universidade divulga iha dia 21 fulan ne’e, ne’ebé mak tuir família matebian sira katak, informasaun ne’e ofende tebes  família sira. Universidade husu diskulpa ba informasaun ne’ebé mak fó sai tiha ona  hodi hein prosesu tuir mai”, esplika Reitor UNPAZ,  Adolmando Amaral, ba jornalista sira Tersa (23/06/20), iha salaun enkontru UNPAZ, Manleuana, Díli.

Família matebian iha Tersa (23/06/20) transporta matebian Henrrique husi nia rezidénsia aldeia Efaca Díli ba Suku Goulolo munisípiu Ermera  lori  ba tau iha uma lisan hafoin  hala’o seremonia funeral.

Listo de Jesus, husu ba Reitor UNPAZ Adolmando Amaral, atu koopera ho família matebian, hodi buka identifika estudante sira seluk tan ne’ebé mak involve iha kazu ne’e, hodi submete ba prosesu investigasaun.

“Kona-bá responsabilidade ba matebian ami seidauk konkorda, maibé ami konkorda malu oinsá atu lori ema sira ne’ebé mak komete iha krime ne’ebé mak hamate ona ami nia ema”, dehan Listo.

Iha akontesimentu ne’e PNTL munisípiu Díli detein estudante estajiariu UNPAZ na’in 16. Husi akontesimentu refere estudante na’in 6 hetan kanek. avi