Sidadaun estranjeiru na’in 13 submete ba prosesu investigasaun

Sidadaun estranjeiru na’in 13 ne’ebé mak Polísia Unidade Marítima kaptura iha illa Jaco submete ona ba prosesu investigasaun.

Sidadaun sira ne’e, kaptura husi Unidade Polísia Maritima ne’ebé mak koloka iha Com Lospalos, iha semana ne’e.

Durante hala’o kapturasaun, Komandante Polísia Maritima Superintendente Assistente, orienta kedas, Polísia investigasaun  disloka ba  Com, hodi loke prosesu investigasaun.

“Ha’u  hanoin iha loron hirak ne’e akontese iha Jaco ne’ebá, altura  ne’ebá kuandu ha’u simu informasaun husi Postu Com UPM, ha’u orienta kedas membru sira tuun ba iha lokasi hodi identifika kedas sidadaun sira ne’e, aumesmu tempu ha’u fó orientasaun ba Komandante Operasaun no Kapitaun Ro Lucitania inklui Xefe Investigasaun  hodi hare’e. Ohin  ha’u hatoo ona relatóriu ba Komandante jerál PNTL atu informa  situasaun ne’e, ba sidadaun ne’e 13 pesoas, na’in 11 husi nasaun Vietname, na’in rua husi Indonézia”, esplika Komandante UPM Superintendente Assistente Basílio de Jesus, ba GMN Tersa (16/06/20), wainhira hala’o operasaun  iha illa Atauro.

Tuir Komandante ne’e, sidadaun estranjeiru sira ne’e, mai husi Indonézia  liu husi tasi nasaun Indonézia, maibé  la hatene sira nia objetivu lolos atu ba nasaun ida ne’e. Tanba   prosesu investigasaun sei hala’o hela.

 “Agora iha ona prosesu ita intrega ona ba parte sentru jestaun krizi ba COVID 19  hodi haree buat ne’e, depois Estadu  Timor-Leste sei desidi bainhira mak sira nia kuarentena remata atu haruka fila-fali ba sira nia rai kon formi kompeténsia Estadu ne’ebé  mak  iha tiha ona”,dehan Basílio de Jesus.

Entré sidadaun sira ne’e,  na’in 11 nasaun  Vietname, ne’ebé ho pasaporte  na’in rua sidadaun  Indonézia laiha pasaporte.avi