Durante EE, Alfándega prende tabaku saka 10 no adubu líkidu kaixa 80

Durante implementasaun Estadu Emerjénsia (EE) fulan tolu, servisu alfándega sita tabaku saka sanulu (10) no adubu líkidu kaixa walu nulu (80), tanba laiha autorizasaun husi ministériu relevante.

Diretór Jeral Autoridade Aduaneiro Alfándega, Julião José Ximenes, hateten, sasan hirak ne’ebé Alfándega prende, dau-daun ne’e rai hela iha postu integradu Batugade, hodi prosesa tuir lei ne’ebé mak vigora iha Timor-Leste.

Julião esplika liu tan, sasan merkadoria hirak ne’ebé mak durante ne’e tama liu husi fronteira terestre semana ida dala ida, ho kamioneta lima nulu  to’o hitu nulu.

“Iha líkidu balun ne’ebé hanesan líkidu balun tenke iha autorizasaun husi Ministériu Agrikultura no Peska (MAP), maibé komu laiha, ami neste momentu sira hakarak selu taxa, maibé tenke husu lai autorizasaun husi MAP, no mós mai hatama tabaku ne’ebé ita tahan, tanba maske mai sira hakarak selu taxa sira rejistu duni iha dokumentu laran, maibé sira tenke hetan autorizasaun iha ministériu saúde kona-ba rejime kontrolu tabaku sira mai, sira laiha autorizasaun husi ministériu saúde automátikamente alfándega sei tahan ita hein dezisaun husi ministériu saúde”, dehan, Diretór Jeral Autoridade Aduaneiru Alfándega, Julião José Ximenes ba GMN iha nia kna’ar fatin, Palásiu Governu, Segunda (20/07).

Diretór Jeral Autoridade Aduaneiro Alfándega ne’e informa liu tan, iha kazu balun alfándega aplika dau-daun ona koima administrativa no balun ne’ebé mak kompetensia MAP ni’an.

Alfándega prende no rai hela iha postu Batugade, hodi hein prosesu husi MAP.

Durante ne’e alfándega serbisu hamutuk ho ministériu relevante hanesan, Polísia Sientífika Investigasaun Kriminal, Ministériu Públiku no seluk tan.

Julião relata, maske dau-daun ne’e laiha ona Estadu Emerjénsia, maibé Alfándega kontinua destaka nia membru iha fronteira, hodi halo kontrolu ba sasan merkadoria ne’ebé tama no sai liu husi fronteira. Ina

Leave a Reply

Your email address will not be published. Required fields are marked *