Fasilita patrullamentu marítima, FRETILIN husu Governu hadi’a ró Kay Rala

Reprezentante povu iha uma fukun Parlamentu Nasionál (PN), deputadu Favião Oliveira husu ba Governu atu halo manutensaun ba ró patrullamentu Kay Rala, ho nune’e bele fasilita di’ak liu tan servisu Unidade Polísia Marítima (UPM).

“Tuir informasaun ne’ebé mak ha’u rona husi sira katak, halo manutensaun ba ró (Kay Rala-red) refere mínimu gasta osan USD rihun 37, maibé ba iha másimu presiza rihun 100, ida ne’e di’ak liu ona atu halo prevensaun hodi kontrola no halo patrullamentu iha área tasi Timor ni’an“, deputadu husi bankada FRETILIN ne’e liu husi ninia intervensaun iha plenária, Segunda (13-07-2020).

Favião akresenta, maske dau-daun ne’e UPM uza ró Kay Rala Xanana Gusmão hodi halo patrullamentu iha área marítima, maibé haree ba ninia kondisaun, Governupresiza halo mantensaun ba Ro refere.

Maibé iha buat balun ne’ebé falla iha patrullamentu mak presiza iha atendimentu di’ak ba iha área fronteira marítima.

Hatán ba asuntu ne’e, Ministru Asuntu Parlamentár no Komunikasaun sosiál (MAPKS), Francisco Jerónimo, rejista no sei hato’o ba ministériu kompetente atu haree asuntu refere.

Entretantu ró Kay Rala Xanana Gusmão Timor-Leste ne’e hetan apoiu husi Governu Xina, iha tinan 2018. ety