FMTL kontra esbosu lei kriminaliza difamasaun

Front Mahasiswa Timor-Leste (FMTL), deklara, kontra planu Ministru Justisa, Manuel Cárceres ne’ebé hamosu esbosu lei kriminaliza difamasaun, tanba lei ne’e sei hamate liberdade imprensa no liberdade espresaun iha Timor-Leste.

Porta Voz FMTL, Joselino Pereira, hato’o deklarasaun ne’e liu husi konferénsia ba imprensa iha kampus Universidade Nasional Timor-Lorosa’e (UNTL), Liceu Kolmera, Díli Segunda (13/07).

“Ami la konkorda ho Ministru Justisa atu kria tan esbosu lei hodi hamate demokrasia, liberdade imprensa no liberdade espresaun, tanba la valoriza sentidu Estadu direitu demokrátiku no ignora tiha povu nia luta ba libertasaun pátria. Tanba ne’e ami konsidera kriasaun lei difamasaun ne’e atu halakon demokrasia ne’ebé sosa ho povu nia sofrimentu husi ditadura militar”, hateten Joselino Pereira ba Jornalista sira, hodi husu ba Governu atu lalika lakon tempu ba hamosu lei kriminaliza difamasaun ne’e.

“Ami hakarak sujere ba Ministru Justisa, Manuel Cárceres, diak liu kria de’it lei cyber crime (sibernétika) hodi bele kontrola ema ne’ebé utiliza média sosiál hodi tolok ema seluk. Tanba ne’e, bainhira atu kria lei ruma tenke konsulta uluk lai, labele ohin mehi, aban kria lei konforme Ministru nia hakarak”, katak Joselino.

Entretantu, Novelino dos Santos, nu’udar mos membru FMTL, promete, bainhira Ministru Justisa la kansela esbosu lei ne’e FMTL hamutuk ho sosiedade sivíl halo asaun pasífika hasoru nia.

“Husu ba Ministru Justisa, Manuel Cárceres atu kansela esbosu lei difamasaun ne’e antes atu lori ba debate iha Parlamentu Nasionál, nune’e labele halo públiku konfuzaun bei-beik”, informa Novelino.

Nia dehan, FMTL mos prepara ona karta submisaun ba Ministru Justisa, Manuel Cárceres atu tetu fila-fali ninia desizaun ne’e hodi kansela.

“Se Ministru Justisa laiha resposta mak ami sei tún halo demonstrasaun bo’ot hasoru ‘Ministru Justisa’, Manuel Cárceres”, dehan tan nia.

Antes ne’e, Eis-Prezidente Repúblika, José Ramos Horta iha loron 5, fulan Jullu ne’e ho mós sosiedade sivíl sira hato’o ona sira-nia lamentasaun kona-ba esforsu Governu hodi hamosu esbosu lei kriminaliza difamasaun ho karákter atu hamate liberdade imprensa no liberdade espresaun iha Timor-Leste. aba