Kriminaliza enrikesimentu ilísitu kontra sistema no konstituisaun

Membru  Komisaun A Parlamentu Nasionál, deputada Carmelita Moniz, hateten, kriminaliza enrikesimentu ilísitu sai polémika, tanba artigu ne’e kontra sistema no konstituisaun.

Carmelita Moniz hato’o kestaun ne’e,  iha Parlamentu Nasionál, Sesta (10/7/2020).

Reprezentante  povu ne’e esplika, sistema Timor-Leste hateten, na’in ba asaun penál maka Ministériu Públiku, maibé sé Ministériu Públiku akuza  tenke komprova,  la’os na’in rasik mak komprova  nia-an.

Maibé Carmelita hateten,  iha artigu ne’e hatete katak, primeiru iha prinsípiu prezunsaun inosensia,  kulpa proporsionalidade ema iha direitu atu nonok.

“MP ho KAK ho PSK sira maka tenke esforsu komprova katak rendimentu ka rikeza ne’ebé nia rasik la koalia nia la justifika mai husi krime sa ida los nune’e juis sira hodi bele determina nia pena se nia nonok Estadu foti hotu nia rikeza no nia hetan kastigu. Artigu refere sei lori ba PR tanba iha jurista barak oinsa artigu ne’e liga fali ita-nia konstituisaun RDTL no sistema rasik oinsa ami seidauk marka ami-nia pozisaun atu aplika la aplika ba ami hanesan de’it”, dehan Carmelita.

Carmelita mós hateten, projetu lei medidas prevensaun no kombate korrupsaun sei kriminaliza setór privadu, emprezáriu  ne’ebé prátika subornu ba entidade setór públiku.

Projetu lei medida prevensaun no kombate korrupsaun komisaun A aprova ona no sei aprezenta relatóriu pareser ba Prezidente Parlamentu Nasionál. ety