PNTL la autoriza manifestasaun kontra Lú Olo

Komandante Jeral Polisia Nasional Timor Leste (PNTL), Faustino da Costa, hatete, nia parte simu ona karta koñesimentu husi grupu balun ne’ebé atu hato’o petisaun ba Xefe Estadu, tanba ne’e Komandante Jeral ne’e la autoriza atu grupu refere halo manifestaun.

“Iha publikasaun balun grupu ka ema balun atu organiza halo manifestasaun, atu dehan hanesan komandante ami simu duni karta koñesimentu ida iha dia 14, tanba ne’e mak ami bolu ona parte sira ne’ebé atu organiza haree ba kestaun legal no prosedimentu hotu los duni katak konstituisaun prevé ema hotu halo asaun saida ou manifestasaun, maibe iha lei oan balun husu para atu tuir prosedimentu ka rekezitu balun”, dehan Komandante Jeral PNTL ne’e ba jornalista sira, Kinta (16/07/2020) iha Palasiu Prezidensial Nicolão Lobato, Bairo Píte, Díli.

Nia salienta, buat ne’ebé mak sira tenke kumpre mak primeiru tenki ser fo hatene ba polisia loron haat tuir malu antes,  se mak atu organiza ema nain hira mak atu organiza, ema nain hira tenki mai, ne’ebé atu dehan deit bolu sira nia parte mai laiha manifestasaun ida atu akontese, tanba tempu no prosedimentu ne’ebé iha liu ona, sees ona husi lei no autorizasaun manifestasaun nian.

“Ne’e mak ami dehan ba ita bo’ot sira no ba públiku laiha buat ida manifestasaun, sei iha duni reprezentante husi ema ida ka rua tuir sira nia koordenasaun ho polísia mak sei hato’o petisaun mai Prezidente, mas la’os halo manifestasaun, sei la mobiliza ema barak atu halo asaun ne’e iha ona konkordansia ho autoriedade seguransa”, subliña Faustino.

Komisáriu Faustino hatutan, sira hato’o ba grupu refere bainhira iha asaun balun depois derepente iha ema barak halo buat balun mak grupu ne’ebé halo pedidu organiza ne’e, PNTL  sei bolu para responsabiliza. Oly

Leave a Reply

Your email address will not be published. Required fields are marked *