PNTL manufahi detein membru KORK 66

Polísia Nasionál Timor-Leste (PNTL) munisípiu Manufahi detein  membru Arte Marsiál Kmanek Oan Rai Klaran (KORK) hamutuk 66, tanba hala’o atividade sa’e sintu no juramentu.

Membru arte marsiál sira ne’e detein iha Kuarta (15/07/20), iha aldeia Turon, Suku Babulu, postu Administrátivu Same.

“PNTL munisípiu Manufahi halo patrulla la’o ain  iha oras tuku ida meudia, simu informasaun husi fontes kredivel iha terenu katak, iha grupu ne’ebé hanaran Kmanek Oan Rai Klaran, hala’o hela treinamentu iha aldeia Turon, Suku Babulu Postu Administrátivu Same. Wainhira simu tiha informasaun ida ne’e komando ho ekipa desloka kedas ba iha terenu, realidade  katak, grupu ka organizasaun ne’e hala’o hela treinamentu, halo  hela izame sa’e sintu no halo juramentu, entaun ita halo aprosimasaun no grupu ne’e rasik koopera tebes no ita kaptura sira emidiatamente hodi mai submete ba prosesu investigasaun”, esplika  Komandante PNTL munisípiu Manufahi, Superintendente Joni Viana, ba GMN Kinta (16/07/20).

Joni Viana akresenta, entré  ema 66, ema idade minoridade hamutuk 24.

“Ita halo kedas  investigasaun  ita rekolla  kedas evidénsia iha fatin lokal de krime, ita lori sira nia fardamentu, sira nia sabuk, sira nia tudik no seluk tan, ita lori mai komando para halo prosesu, ao mesmo tempu ita komunika kedas ba iha prokuradór distrital Suai, hodi hetan oriéntasaun, portantu oriéntasaun klaru, no  ita kontinua halo prosesu tomak ita enkamiña ona ba iha Ministériu Públiku”, dehan Joni Viana.

Komandante ne’e akresenta, maske governu reativa ona Grupu arte marsiáis, maibé PNTL kontinua uza lei númeru 5/2017/pratika arma branka hodi halo atuasaun.

Tanba ne’e, Komandante PNTL Same ne’e husu nafatin ba joven sira atu kontribui paz no estabilidade. avi