JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PR Lú Olo la responde karta petisaun, RNDJK sei hatún povu tomak halo demonstrasaun bo’ot

PR Lú Olo la responde karta petisaun, RNDJK sei hatún povu tomak halo demonstrasaun bo’ot

Rezisténsia Nasional Defende Justisa no Konstituisaun (RNDJK), deklara ba públiku katak, sira-nia parte sei hatún povu tomak halo demonstrasaun bo’ot kontra Prezidente Repúblika (PR), Francisco Guterres Lú Olo, kuandu nia la responde ezijensia ne’ebé povu fó liu husi petisaun kona-ba formasaun VIII Governu ne’ebé la tuir konstituisaun no klarifika partidu FRETILIN ne’ebé nia rasik lidera sai fali ai-tonka ba Governu ida ne’e.

“Demonstrasaun sei mosu em quanto petisaun ne’ebé que atu envia ba Prezidente da Repúblika, laiha resposta. Iha ne’e (RNDJK) laiha ema ida politiza, iha ne’e ema hotu hamriik reforsa malu atu defende konstituisaun”, deklara portavoz RNDJK, Ángela Freitas liu husi konferensia ba imprensa Sesta (17/7/2020), iha iha rezidensia bairu Formoza, Díli.

Ángela Freitas hatete, organizasaun RNDJK laiha kór partidu polítiku ida, maibe RNDJK kompostu husi povu tomak, komponente hotu ne’ebé mak atu hamriik defende konstituisaun hodi fó ezemplu diak ba jerasaun foun sira tuir mai.

“Agora fila-fali ba povu (people power) povu mak deside. Se Prezidente da Repúblika iha responsabilidade moral, diak liu rezigna-an para hamutuk atu hadia naksalak sira ne’e”, dehan portavoz Ángela Freitas.

Nia dehan, kona-ba asinatura povu nian iha petisaun ne’e konstituisaun mak fó dalan, laiha ema ida inventa. “Se laiha resposta husi Prezidente da Repúblika mak massa sei tún. Forsa ne’ebé halibur-an iha RNDJK ne’e komponente hotu ne’ebé que iha rezistensia nia okos hanesan sidadaun”, dehan tan portavoz RNDJK ne’e.

Kona-ba karta petisaun husi RNDJK ninian, portavoz Ángela Freitas, hatete, diak liu mak PR Lú Olo lalika dada tempu hodi estuda tan.

“Karta petisaun ne’ebé sei hato’o husu Prezidente Repúblika labele lori tempu estuda. Se lori tempu estuda tinan rua tan to’o nia mandatu remata, entaun Prezidente Repúblika, gagal total. Ba intelektuais, partidu politikus, ONG, relijiozus lia-nain sira, joven sira atu sai forsa ida deit, atu hamriik dala ida tan atu defende konstituisaun. Ami espera katak, Prezidente da Repúblika labele estuda tan to’o gagal ba dalarua”, dehan Ángela.

Lee hotu :   TDD kontinua hamosu sasin ba kazu kontentór rua lakon

“Ami sei hato’o petisaun ba PR atu komprova ba mundu katak rezisténsia iha responsabilidade, iha maturidade polítika atu hasoru, atu lori, atu envia surat petisaun ne’ebé ami preparadu atu haruka ba Prezidente da Repúblika. Surat petisaun ne’e ami sei husu ba povu tomak atu bele asina, tanba ne’e duni sei lori tempu. Asina tiha petisaun ida ne’e mak sei entrega ba PR. Tanba konstituisaun baze fundamentu ba ita, ita presiza respeita povu ninia direitu ne’ebé que depozita iha eleisaun.” tenik tan portavoz Ángela Freitas.

Ángela Freitas mos sente ladiak kuandu partidu kiik-oan sira mak “nakdedar moris” ba forma fali Governu no hetan viabilizasaun husi partidu FRETILIN ne’ebé konstituisaun la hakerek hanesan ne’e.

“Ita haree deit partidu ne’ebé ho asentu 8 (PLP), asentu 5 (KHUNTO) mak hamutuk forma Governu, entaun ita la presiza ona ba eleisaun. Partidu maioria mak ukun, agora partidu kiik oan rua mak halai hamutuk ba forma fali Governu? Ida ne’e la loos! E pior liu mak FRETILIN ba halo ai-tonka hodi viabiliza Governu. Tuir loloos labele”, dehan Ángela Freitas, hodi VIII Governu nia ukun ida ne’e la’o sabraut, gasta deit osan povu nian hodi habokur governante sira.

Nune’e mos Grupu Rezisténsia Nasionál Defende Justisa no Konstituisaun (RNDJK), husu ba Prezidente Repúblika (PR) Francisco Guterres Lú-Olo, atu resposta sira-nia petisaun hodi rezigna-an, tanba konsidera viola Konstituisaun RDTL.

“Prezidente Repúblika tenke iha responsabilidade moral atu rezigna-an, tamba ida ne’e ejijénsia husi povu maioria.PR ohin loron nia akompanha transmisaun direta ida ne’e ,husu PR nia konsiensia ,responsabilidade moral,hanesan xefe estadu diak liu lalika halo tan povu kolen tan hodi tun mai diak liu rezignaan entrega fila-fali poder ne’e ba povu mak determina semak atu kaer ukun. Sé PR iha responsabilidade moral diak liu rezigna-an kuandu PR lá responde maka demostrasaun pasifíka sei mosu hasoru PR Lú-Olo.Tempu to’o ona PR tenke rezigna-an entrega fila-fali poder politíka ba povu nia liman atu husik povu rasik deside tuir konstituisaun Artigu 72”, hatete portavoz Grupu Resisténsia Nasionál Defende Justisa no Konstituisaun, Ángela Freitas.

Lee hotu :   Ahi han motuk motor ida iha Hudi-Laran

Portavoz RNDJK Ángela Freitas, haktuir, Prezidente Repúblika, Francisco Guterres Lú-Olo, la resposta petisaun ne’ebé sira sei hato’o, maka Grupu Resisténsia Nasionál Defende Justisa no Konstituisaun mobiliza povu husi munisípiu 12 inklui RAEOA hodi hala’o asaun pasifíku hasoru Prezidente Repúblika.

Portavoz Grupu Resisténsia Nasionál Defende Justisa no Konstituisaun Ángela, afirma, iha nasaun demokrátiku hanesan Timor-Leste mak ukun la tuir regra, tenki rezigna-an hodi fó fali ba povu hodi deside.

“Ita hotu akompanha katak,ita nia orgaun 4 viola tiha ona Konstituisaun komesa husi PR mai iha ezekutivu, lejislativu no mos tribunál. Nu’udar xefe Estadu, tenke respeita povu nia votu la’os ita atu halo tuir povu nia hakarak. Tamba ne’e iha tempu badak rezisténsia sei halibur asinatura ho petisaun ne’ebé sei aprezenta ba PR iha tempu badak no sei husu ba PR atu responde povu nia ezijénsia no tenke rezigna-an”, Ángela hatete.

Tuir observasaun Jornalista GMN nota iha terenu katak, fatin konsentrasaun masa iha rezidénsia grupu RNDJK ne’e nian hetan seguransa másimu husi Polisia Nasionál Timor-Leste,no taka Estrada iha sentru saúde Formoza no  dalan diresaun De-Be Fonte Númeru 6 formoza.

Husi inísiu  Governu da Ualu forma husi koligasaun Aliansa Mudansa ba Progresu (AMP) ne’ebé kompostu husi partidu tolu mak hanesan, CNRT, PLP no KHUNTO, maibé koligasaun AMP ne’e nakfera, hafoin partidu CNRT vota abstensaun ba Orsamentu Jeral Estadu tinan 2020 nian iha Parlamentu Nasional (PN).

Nune’e, Prezidente Repúblika, fó fiar ba partidu polítiku sira atu mobiliza malu hodi buka konsensu hodi forma Governu, entaun koligasaun lideradu Kay Rala Xanana Gusmão kompleta rekezitu hodi ba hasoru Prezidente Repúblika atu nune’e bele forma Governu foun. Maibe koligasaun lideradu Xanana ne’e, PR Lú Olo, la foti desizaun ruma no deklara ba públiku katak, nia sei estuda lai. Nune’e to’o ikus mai bolu fali partidu FRETILIN, PLP no KHUNTO mak ba hamutuk hodi forma VIII Governu, iha ne’ebé tuir lolos ne’e la eziste ona tuir Primeiru Minstru, Taur Matan Ruak, hatete katak, Aliansa Mudansa ba Progresu ne’ebé forma VIII Governu, CNRT baku mate tiha ona, no nia hakoi tiha ona. Maibe to’o agora VIII Governu sei eziste. Tanba hetan ai-tonka husi FRETILIN.

Lee hotu :   Kazu Timor-oan lori droga ba Atambua, posibilidade iha krime koneksu ■ TL sei esforsu proteje nia sidadaun na’in rua

Tuir observasaun Jornalista GMN nota iha terenu katak, fatin konsentrasaun massa iha rezidénsia Ángela Freitas nian seguransa másimu husi Polisia Nasionál Timor-Leste,no taka Estrada iha sentru saúde Formoza no  dalan diresaun De-Be Fonte Númeru 6 formoza. Tos

Add to Comments Here!!!!

error: Content is protected.
Secured By miniOrange
You might also like:
SAMES: USD tokon 3 la sufisiente garante stock ai-moruk

Diretór Servisu Autónomu Medikamentu Ekipamentu Saúde...

Eis PPN: Lei kriminaliza difamasaun, ita sei lakon liberdade espresaun

Eis Prezidente Parlamentu Nasionál (PPN), Arão...

Komisaun A finaliza ona relatóriu lei MPCC

Deputadu sira husi komisaun A ne’ebé...

Close