Taur ho Vise Ministru Interior sei dezenvolve PNTL

Ministru Interiór nu’udar mos Primeiru Ministru, Taur Matan Ruak no Vise Ministru Interiór, António  Armindo, sei servisu hamutuk  hodi dezenvolve instituisaun Polísia Nasionál Timor-Leste (PNTL) ba oin.

Lia hirak ne’e hato’o husi Vise Ministru Interiór, António Armindo ba jornalista sira, Kinta (09/07/20) hafoin ho Ministru Interiór Taur Matan Ruak, hala’o vizita ba iha Kuartel Jerál PNTL, Kaikoli, Díli.

António Armindo, dehan, objetivu vizita mai Kuartel Jerál PNTL ne’e atu halo enkontru ho Komandante Jerál  PNTL, Komisáriu Faustino da  Costa, ho nia segundu, inklui Komandante Munisípiu 13, atu bele koñese malu diak liu tan, no servisu hamutuk, hodi dezenvolve instituisaun PNTL  sai profesional, nune’e servi seguransa ba povu iha rai doben Timor-Leste.

“Ami koalia kona-bá dezenvovimentu ba instituisaun PNTL  iha futuru, atu dezenvolve instituisaun ida sai profesionálizmu bele kompara ho nasaun sira seluk ni’an, instituisaun ida ne’ebé bele orienta nia membru sira hodi servi povu ida ne’e”, esplika Vise Ministru Interiór, António Armindo iha Kuartel Jerál PNTL, Kaikoli, Díli.

Alénde ne’e, Komandante Jerál PNTL, Komisáriu Faustino da Costa, konsidera, vizita  Ministru  Interiór no Visé Ministru Interiór, hanesan apoiu ba PNTL.

“Ba oin ami sei hala’o enkontru bebeik ho Ministru Interiór no Visé Interiór, hodi dezenvolve instituisaun PNTL”, dehan  Faustino da Costa.

Enkuantu Vise Ministru Interiór, simu pose iha loron 24, fulan Juñu, tinan ne’e, no  Primeiru Ministru, Taur Matan Ruak asume mós kargu Ministru Interiór, hodi tau matan ba instituisaun PNTL ho funsionáriu sira iha Ministériu Interiór tomak. avi