Tenta fó subornu ba PNTL, Xinés ida hetan detensaun

Polísia Nasionál Timor-Leste (PNTL), liu  husi seksaun Tránzitu munisípiu Díli detein sidadaun Xinés ida ho inisiál DCD iha sela detensaun, tanba  tenta atu subornu membru PNTL ho USD 20.

Kazu ne’e akontese iha Tersa (21/07) iha área kruzamentu Ai-Mutin, Postu Administrátivu Dom Aleixo, Munisípiu Díli.

Komandante PNTL Tránzitu munisípiu Díli, Inspetór Domingos Sarmento, hateten, sidadaun Xinés ne’e, kondus kareta Hilux mutin ho xapa matrikula A 13-708 TL mai husi  Diresaun Ai-Mutin Obralan, maibé to’o iha kruzamentu motorista ne’e fila kareta liman loos, maibé sinais Polísia ni’an  la autoriza.

Tanba ne’e, membru Polísia Tránzitu hetan hapara kareta ne’e, hodi husu tuir, maibé sidadaun Xinés hasai osan USD 20 atu fó subornu ba membru Polísia, maibé  membru Polísia ne’e la simu hodi kaptura kedas Xinés ne’e lori mai iha Kuartel PNTL, Díli, hodi submete ba prosesu investigasaun no detein kedas iha sela detensaun durante oras 72, hafoin lori ba Tribunál Ditritál Díli.

“Sidadaun Xinés losu osan husi bolsu ho valór  USD 20, koko atu fó subornu ba  ita nia membru ne’ebé mak hala’o kna’ar iha iha momentu ne’ebá, entaun momentu ita nia membru sente buat ne’e labele akontese, krime públiku, liu-liu kontra kodigu penal 294, korupsaun ativu, korupsaun ne’e komete husi sidadaun Xineza ne’e rasik, entaun ita nia membru Polísia ne’e sente la satisfas ho hahalok husi sidadaun Xineza ne’e halo, entaun ida ne’e nia konsidera hanesan flagrante delitu, entaun ita nia membru ne’e kaptura sidadaun ne’e lori mai tránzitu Díli, hodi submete ba prosesu investigasaun  tuir lei”, esplika Komandante Tránzitu munisípiu Díli, Inspetór Domingos Sarmento, ba GMN, Tersa (21/07/20), iha Kuartel PNTL, Caicoli, Díli.

Fo hanoin fali mos katak, kareta ne’ebé sidadaun estránjeiru ne’e kondus marka Hilux ho nia xapa matrikula A 13-708 TL no daudauk ne’e asegura ona iha Kuartel PNTL munisípiu Díli. avi