Durante fulan Jullu PNTL Baucau rejista kazu 79

Komandante Munisípiu Baucau, Superintendente Xefe, Armando Monteiro, informa, durante fulan Jullu, tinan ne’e, Polísia Nasional Timor-Leste (PNTL), Munisípiu Baucau rejista kazu 79, husi numeru ne’e aas liu mak violensia domestika.

“Ita rejistu kazu total fulan Jullu de’it kazu 79, husi 79 ida ne’e kazu a’as liu mak problema família violensia doméstika, segundu problema juventude, treseiru problema disputa rai liga ba problema sosial mós ne’e rejistu kriminalidade, asidente ita rejistu, maibé asidente kma’an ladun rezulta vida, tantu mós kanek, mós kanek kma’an balun ne’ebé mak agora dau-dauk ita halo atendimentu no prosesu husi kazu ida ne’e, kazu boot liu 3 mak insendiu iha Namanei ne’ebé mak ita nia uma komunidade ida mós hetan estragu, prosesu investigasaun remata ona, ita aprezenta ona ba Ministériu Públiku, suspeitu ita submete ona ba prosesu”, Komandante PNTL Munisípiu Baucau, Superintendente Xefe Armando Monteiro ba GMN, hafoin partisipa misa re-inagurasaun Katedral Santo Antonio Baucau no aniversariu Santo António ba dala 825, iha Baucau, Sabadu (15/08/2020).

Alende ne’e, Armando mós informa kona-ba insendiu ou ema balun sunu uma iha suku Nunira iha Kinta loron 13 liu ba, ne’ebé rezulta uma komunidade 4 hetan estragu total no 10 hetan estraga kma’an.

Ho akontesimentu ne’e, PNTL apoiu husi Batallaun Orden Públiku (BOP) iha Baucau no mós komponente terestre forsa armada hola kedas medida, hodi kaptura autor na’in 4 iha fatin akontesimentu.

Hafoin akontesimentu kaptura tan na’in 5, tanba PNTL koordena ho autoridade lokal no autór kuaze na’in 20 mak sei submete ba prosesu investigasaun.

Tuir Komandante PNTL Munisípiu Baucau, motivu husi akontesimentu sunu uma hirak ne’e, kulminasaun problema pasadu ni’an.

Superintendente Xefe Armando informa, maske durante ne’e mosu akontesimentu oi-oin, maibé dau-daun ne’e situasaun iha munisípiu Baucau la’o normal, tanba PNTL kontinua halo seguransa ho máximu. Ina