Garante seguransa no defeza nasionál, TL presiza iha estabilidade polítika

Komandante Komponente Navál FALINTIL-Forsa Defeza Timor-Leste (F-FDTL), Capitao–de-mar-e-guerra, Higinio das Neves, hateten, Timor-Leste presiza iha estabilidade polítika, atu nune’e bele garante seguransa no defeza nasionál.

“Fokus importante liu ba seguransa nasionál mak estabilidade polítika tenke iha. Sé ida ne’e mak laiha mehi hotu-hotu sei la ba realidade. Tamba iha mundu ne’e, poder haat mak importante liu, poder polítiku, ekonómiku, militar no poder diplomátiku. Ha’u haree dezafiu ohin loron mundu iha estratéjia mundial ameasa funu barak ohin loron mosu. Uluk forsa pratikamente atensaun liu ba invazaun, maibé ohin loron intensaun ida ne’e laiha, maibé haree liu dependénsia ekonómika kada nasaun ”, Capitao–de-mar-e-guerra, Higínio das Neves, bainhira sai orador iha Grande Debate ne’ebé organiza husi Institutu Defeza Nasionál (IDN) ho nia sub-tema Seguransa no Defeza Nasionál ne’ebé hala’o iha salaun Palásio Nobre, Lahane-Díli, Tersa (25-08-2020).

Higinio hateten, atu Seguransa no Defesa Nasionál la depende de’it ba Polísia no F-FDTL, instituisaun Estadu sira seluk mós tenke hadi’a sira nia seguransa, atu nune’e bele garante estabilidade povu, Liu-liu iha área seguransa ekonómika, polítika, ambiental, inklui seguransa ai-han.

Orador prinsipal sira ba Grande Debate sub-tema Seguransa no Defeza Nasionál mak hanesan, Secretário Estado Igualdade Genero, Prezidente Komisaun B Parlamentu Nasionál, Agostinho Sequeira Somotxo, Membro komisaun B, Adérito Hugo da Costa no Asesor Prinsipal Gabinete Vise-Ministro Interior, José Turquel. Oct