JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Lere la tolera ema halo demonstrasaun hatún PR

Lere la tolera ema halo demonstrasaun hatún PR

Xefe Estadu Maior FALINTIL-Forsa Defeza Timor-Leste (F-FDTL), Major Jenerál Lere Anan Timur, sei la tolera kualker sidadaun, atu halo manifestasaun ho intensaun hatún Prezidente Repúblika (PR), Francisco Guterres Lú Olo, ne’ebé mós uluk komanda funu ne’e.

Lere Anan Timur hato’o deklarasaun ne’e ba JNDiário iha Ministériu Defeza Fatuhada, Segunda (31-08-2020), relasiona ho Grupu Rezisténsia Nasionál Defende Justisa no Konstituisaun (RNDJK) atu halo manifestasaun kontra Prezidente Republika, Francisco Guterres Lú Olo, iha loron 4, fulan Setembru mai.

“Ha’u la husik kualker ema seja quem fora hatun ha’u-nia maun sira ne’ebé uluk komanda funu ne’e hahú husi maun Xanana to’o Taur, Lú Olo, Mari Alkatiri no José Ramos Horta, ema ida la hatún, ha’u haruka futu, kesi Ángela ho Ai-Tahan Matak sama belar hotu, bele hatun joven sira ne’e hanesan Prezidente PN, Aniceto ho ministru foun sira bele hatun bá, mas ha’u-nia katuas sira la hatún ho asaun demonstrasaun, ha’u haruka sama sira no ha’u responsabiliza iha tribunál, iha direitu umanu, ha’u responsabiliza uluk funu ne’e o iha ne’ebé? Agora uma ne’e ami mak harii o haruka ami sai husi uma, o la’ós uma-nain tan, ami harii uma ne’e ami mak uma-nain, o hakarak duni ami husi ami nia uma ne’e”, dehan Lere.

Lere Anan Timur, apela ba Porta Voz grupu RNDJK, Ángela Freita ho Ai-Tahan Matak, tenke kuidadu, wanhira atu hatún massa hodi halo asaun pasífiku hodi hatún Prezidente husi Palásiu Prezidensiál.

Xefe Estadu Maior FALINTIL-Forsa Defeza Timor-Leste (F-FDTL) ne’e mós konsidera, sé Porta Voz grupu RNDJK, Ángela Freitas ho Ai-Tahan Matak, mak hatún Prezidente Repúblika, signifika grupu RNDJK duni sai Lú-Olo husi nia uma rasik.

Lee hotu :   Eis membru GAM labele koko seguransa Estadu

“Ha’u rona Ángela dehan atu hatun Prezidente Repúblika dia 4, ha’u laiha iha ne’e, ha’u iha Iliomar, ha’u husu ba Ángela o mak hatún Prezidente ka tali mak sa’e fali, lolos ne’e ita nia Estadu ne’e labele hatama ona ema hanesan Ángela ne’e mai iha Timor, maske nia Timor-Oan, nia halo saída krize 2006 nia halo Majór Alfredo mate, depois Mauk Moruk mate tán nia mak asesora depois halo tán ida ne’e”, hatete Lere Anan Timur.

Tuir planu Porta Voz Grupu RNDJK, Ángela Freitas ho Ai-Tahan Matak, sei organiza massa hodi halo asaun pasifiku, hodi hatun Prezidente Repúblika, hahú iha loron 4, fulan Setembru, tinan ne’e, iha Kampu 744 Becora no Tasi Tolu.

Ângela Freitas: Públiku labele terpancing

Porta-Voz Grupu Rezisténsia  Nasionál  Defende Justisa no Konstituisaun RDTL (RNDJK), Ângela Freitas, deklara, públiku labele terpancing ho deklarasaun sira ne’ebé sira koalia sai ona, tanba nia nunka hirus malu ho Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur.

Ba kestaun  ne’e, Ângela Freitas, konsidera  normál, oinsá atu halo ekilibrasaun polítika rai-laran. Tanba Estadu direitu demokrátiku nia lala’ok mak nune’e ona.

“Ha’u hanoin katak, Jenerál Lere nia koalia buat ida ne’ebé que atu oinsá atu halo ekilibrasaun polítika ba rai-laran, polítika  ne’ebé mak  klase tinggi ne’ebé ha’u labele koalia iha ne’e, ne’e konfidensiál, maibé ami nunka fahe malu, tanba ami sira ne’e mai husi rezisténsia. Ne’e problema polítika ha’u ho maun Lere ne’e laiha problema ami sempre hamutuk, han hamutuk, hemu hamutuk, ami komunika ba malu. Tanba ne’e mak públiku labele terpancing  ho situasaun ne’e”, esplika Porta Voz Grupu RNDJK, Ângela Freitas ba  jornalista sira Segunda (31/08/20), iha Kuartel Jerál PNTL, Caicoli, Díli.

Lee hotu :   Uza osan la tuir prosedimentu, TDD aplika indemnizasaun USD 600 ba Diretór DNCPIA

Ângela akresenta, agora dadauk tempu to’o ona atu halibur ema rezisténsia sira atu hamutuk, hodi hadia rai ida ne’e ba futuru ne’ebé mak diak.

Antes ne’e iha loron 21, fulan Agostu, tinan ne’e, liu husi aktividade komemorasaun loron FALINTIL ba 45, iha Liquiça Majór Jenerál Lere Anan Timur, husu ba Ângela Freitas atu labele provoka situasaun, tanba povu  hakarak moris hakmatek. tos/avi

Add to Comments Here!!!!

error: Content is protected.
Secured By miniOrange
You might also like:
Konsellu Estadu rekomenda PR Lú Olo estende EE ba daha’at

Chefe Casa Civíl, Francisco de Vasconselhos,...

Deskonfia envolve pasajen osan falsu, TDD aplika aprezentasaun periódika-TIR ba arguidu sira

Liu husi prosesu Primeiru Interogatóriu (PI),...

Atinji kualidade servisu iha HNGV, Tenke iha padraun ruma sai baze

Diretór Ezekutivu Hospital Nacional Guido Valadares...

Close