PJR prosesa ona keixa Alkatiri kontra CNRT

Prokuradór Jerál Repúblika (PJR), José Ximenes, hatete, keixa husi Sekretáriu Jerál (SekJer) partidu FRETILIN, Mari Bim Amude Alkatiri nian hasoru deputadu bankada CNRT nia prosesu iha ona Gabinete Sentrál Kombate Kriminalidade Organizada (GSKKO).

Líder másimu Ministériu Públiku (MP) ne’e hateten, dau-daun neé sei ferias judisiáriu, tanba ne’e atividade hotu iha MP sei suspende no kona-bá keixa husi eis Primeiru Ministru, Marí Alkatiri dau-daun ne’e prosesu sei la’o hela iha Gabinete Sentrál Kombate Kriminalidade Organizada no bainhira periódu ferias remata MP sei kontinua prosesa kazu  ne’e ba oin.

PJR hato’o asuntu ne’e hafoin remata enkontru mensál ho Prezidente Repúblika (PR), Francisco Guterres “Lú Olo”, Tersa semana ne’e.

“Prosesu keixa ne’ebé senhor Doutor Mari Alkatiri uluk aprezenta mai, ha’u na’in rasik mak simu keixa ida ne’e, prosesu keixa ne’e agora la’o hela iha GSKKO sira analiza hela, tenta bolu intervente prosesuál hotu, mais prosesu la’o hela, como ita boot sira hatene katak ferias judisiáriu ne’e, atividade hotu suspende entaun ita suspende uitoan, mais apartir 15 de Setembro, bainhira la’o normál ona ita bolu hotu intervente prosesuál sira hodi rona”, dehan José.

Keixa SekJer partidu FRETILIN, Marí Alkatiri, hato’o iha loron 7, fulan Jullu, tinan 2020 ba MP kontra akuzasaun deputadu bankada CNRT, inklui média balun ho sidadaun na’in haat ne’ebé nia parte lakohi fó sai naran ba públiku. Oly