PNTL apela vendedór sira kuidadu ho osan falsu USD 20

Segundu Komandante Polísia Nasional Timor-Leste (PNTL), munisípiu Díli Superintendente, Euclides Belo, husu ba vendedór ferik-katuas sira atu kuidadu ho osan falsu USD 20 ne’ebé dau-dauk ne’e hahú sirkula iha kapital Díli.

Euclides Belo hato’o lia hirak ne’e ba jornalista sira, Segunda (10/08/20), iha Kuartel Polísia, Kaikoli-Díli, relasiona ho kazu osan falsu ho valor USD 20 ne’ebé mak ema uza hodi sosa sasán iha Bekora, iha Domingu (09/08/2020).

Euclides Belo hateten, kazu ne’e, submete ona ba prosesu investigasaun, atu nune’e Polísia bele buka tuir suspeitu.

Euclides Belo husu ba vendedor katuas no ferik  sira wainhira ema sosa sira nia sasan ruma ho USD 20 tenke verifika di-di’ak osan refere orijinal ka lae, sé wainhira osan falsu husu atu informa ba Polísia, atu kaptura suspeitu.

“Rejista iha munisípiu Díli, ema tolu ka hat sai vítima  transaksaun ba osan falsu ne’e katak, sira buka katuas-ferik sira fa’an sasan iha ai leva sira ne’ebé matan haree osan la moos, ema sira fasil atu lohi ferik-katuas sira ne’e, maibé  husu ba parte hotu-hotu atu aténsaun ba ida ne’e, atu bele hotu kontribui, para prosesu tomak ne’ebé mak ita iha ne’e bele lori ba oin”, Euclides Belo.

Antes ne’e, mós ema lori osan falsu ho valor USD 20 bosok ona vendedor ai-leba ida  husi Remexio,  munisípiu Aileu, iha Hudi-Laran-Díli. avi