PNTL detein autór prinsipál ba kazu sunu uma iha Laga

Komandante Jerál Polísia Nasionál Timor-Leste (PNTL), Faustino da Costa,  hateten, kazu tentativa omisídiu ne’ebé akontese iha Villa Nova Baucau, polísia detein ona ema na’in ida no oras ne’e kumpre hela prizaun preventiva.

Entretantu akontesimentu sunu uma iha suku Nunira, postu administrativu Laga, polísia identifika ona ema na’in 22 no husi sira ne’e iha ema na’in 6 polísia detein ona hanesan autór prinsipál.

“Hanesan ita boot sira hatene kazu ne’ebe akontese iha Manatuto ne’ebé da’et to’o ba Baucau no Laga Nunira prosesu la’o, ita identifika ona balun hetan ona medidas koasaun balun mai husi parte justisa no seluk prosesu sei la’o hela. Komando mak nafatin orienta no koordena ho autoridade lokal, liu-liu lideransa komunitáriu sira para oinsa enkontru ne’e sira halo atu lebele hamosu tan problema sira ne’e”, Komandante Jerál PNTL ne’e hafoin atualiza situasaun seguransa rai-laran ba Prezidente Repúblika, Francisco Guterres Lu-Olo liu husi enkontru semanál, Palacio Presidente Nicolau Lobato, Bairo Píte, Díli, Kinta (27-08-2020).

Kazu tentativa omisídiu iha Villa Nova Baucau akontese iha loron 12, fulan ne’e, rezulta ema ida kanek, tanba hetan sona husi suspeitu sira. Entretantu kazu sunu uma iha suku Nunira akontese iha Kinta, loron 13, fulan ne’e, suspeitu sira sunu komunidade nia uma hamutuk 16, inklui estraga mós kareta no motor ida.

Antes ne’e mós Xefe aldeia Uasilawa deklara katak, akontesimentu ne’e deskonfia halo husi Grupu Arte Marsiál (GAM) ne’ebé Governu loke fila-fali. oct