Prevene COVID-19 tama TL, PNTL kontrola fronteira rai-maran no tasi

Atu  prevene moras COVID-19 labele tama iha nasaun Timor-Leste, Polísia Nasionál Timor-Leste (PNTL)  kontrola másimu iha  fronteira rai-maran no  mos tasi.

Lia hirak ne’e hato’o husi Komandante Jerál PNTL, Komisáriu Faustino da Costa ba  jornalista sira hafoin abertura partilla informasaun seguransa no prevensaun surtu  COVID-19,  iha área  fronteira Timor-Leste, iha Sentru Formasaun Comoro, Díli.

Faustino da Costa hateten, durante ne’e Unidade patrullamentu Fronteira (UPF) kontrola iha rai-maran, maibé  movimentu ilegál aproveita, liu husi tasi.

Ho ida ne’e, Komandante Jerál PNTL ne’e, orienta Komandante Unidade Polísia  Marítima (UPM), Superintendente Basílio de Jesus, koloka Ró Navio Repúblika Timor-Leste (NRTL), Kay Rala Xanana hodi kontrola movimentu  iha área marítima entre Timor-Leste no Indonézia, iha Mota-Ain.

“Iha dezafiu lubuk ida mak PNTL hasoru katak  ita iha limitasaun ekipamentu, agora saída mak durante ne’e  ita halo  mak oinsa iha máskara  ita buka tan ai-moruk ruma  bele aumenta membru sira-nia estamina hodi hala’o servisu  iha fronteira. Ita mós buka hela ransum  hodi fó ba membru sira iha fronteira. Orienta  UPM ba kedas ho Ró NRTL ne’ebé mak iha, hodi asegura parte tasi nini’an. Ita hotu hatene kuandu ita kontrolu iha rai-maran  movimentu ne’e la’o fali iha tasi, ne’ebé ita koloka Polísia Marítima pelutaun ida iha tasi ni’an hodi asegura  movimentu husi Batugade Mota-Ain, mai to’o iha área Liquiça”, esplika Komisáriu Faustino da Costa.

Líder máximu instituisaun PNTL ne’e koloka  tan Unidade Espesiál Polísia pelutaun ida, hodi reforsa UPF Covalima no Bobonaro, hodi  bele kontrola di’ak liu, atu  nune’e bele prevene ema lori COVID-19 tama iha nasaun ne’e.

“Ami nota katak  iha difikuldade iha ne’ebá, por ezemplu fatin ba UEP atu deskansa hanesan postu sira ne’e no PNTL ita halo koordenasaun ho Timor Leste Police Development Program (TLPDP), ne’ebé ho PNTL servisu kleur ona atu sira bele tau netik mahon ruma hodi Polísia uza. Ne’ebé prosesu ne’e la’o hela, fiar katak tempu badak kompañia ne’ebé mak instala ona uma sira ne’e, atu nune’e membru sira ita koloka ba iha ne’ebá bele okupa”, dehan Faustino da Costa. avi