Suspeita soe bebé kapturadu, PN husu família hanorin edukasaun seksuál ba oan sira

Polísia Sientífika Investigasaun Kriminal (PSIK) kaptura ona suspeita ho inisiál RA ne’ebé mak soe bebé iha Ailok-Laran, Díli. Tanba ne’e reprezentante povu iha Parlamentu Nasional (PN), husu ba família sira no parte edukasaun atu hanorin oan feto sira kona-bá edukasaun seksuál, liu-liu órgaun reprodutiva sira atu sira bele iha koñesimentu.

Iha Tersa (18/08/20) mais ou menus tuku 3 ho balun oras Timor-Leste, PSIK kaptura ona suspeita ne’ebé soe bebé iha Domingu (16/08/20), iha Ailok-Laran Díli.

Hafoin halo kapturasaun iha terenu, PSIK transporta kedas suspeita mai iha PSIK, hodi submete ba prosesu investigasaun.

Xefe Seksaun Sentrál Investigasaun Kriminál, Floriano Serrano, hateten, PSIK identifika suspeita ne’e iha terenu, tanba liu husi ezame sinais ran sira iha lokál krime, hahú iha loron akontese soe bebé no ikus mai konsege detekta suspeita nia paradeiru iha Ailok-Laran rai-hun no halo kapturasaun ba suspeita ne’e.

“Kazu ne’e akontese iha dia 16 de Agostu horibainrua Domingu dader, Xefe prevensaun iha momentu ne’ebá ho nia investigadór sira simu informasaun katak aparese cadaver ou bebé ida iha Ailok-Laran, entaun Xefe Investigasaun emidiatamente PSIK nian deskloka kedas ba iha fatin akontesimentu, iha ne’ebá  hetan duni bebé ida konsege halo izame hatudu sinaís barak, sinaís ida mak hatudu katak, wainhira tuku 9 ekipa PSIK to’o iha lokál de krime iha ona sinaís hatudu katak, bebé ne’e soe iha fatin ne’ebá, maibé iha ona mudansa ba lokal soe bebé la’os iha ne’e, tanba iha informasaun iha dadersan ema ba misa seidauk iha bebé ida ne’e, iha mós sinaís ran no buat seluk iha terenu, depois bazeia ba izame sinaís no informasaun sira ne’e durante loron rua Xefe nafatin lidera ekipa PSIK nian, kompostu husi investigadór ne’ebé mak iha ne’e kontinua buka rekolla iha terenu utiliza téknika Polísiáis ne’ebé mak iha hanesan ami estuda hanesan Polísia Sientífika kontinua buka tuir ohin lokraik ida ne’e deskobre suspeita loloos husi krime refere”, esplika  Xefe  Seksaun Sentrál Investigasaun Kriminál, Floriano Serrano ba GMN, Tersa (18/08/20), iha edifísiu PSIK, Caicoli, Díli.

Hafoin submete suspeita ne’e ba iha prosesu investigasaun, ekipa PSIK lori suspeita ne’e ba iha Hospital Nacional Guido Valadares (HNGV), hodi hala’o izame atu bele komprova autór ba kazu ne’ebé mak soe bebé iha Ailok-Laran. Sidadaun soe bebé ne’e ho idade 21, orijin husi munisípiu Ainaro. 

PN husu família hanorin edukasaun seksuál ba oan sira

Vise Prezidente Parlamentu Nasionál (PN), Maria Angelina Sarmento, husu papel família, inan-aman no parte edukasaun atu bele hanorin, hodi esplika klaru kona-bá funsaun orgaun sira iha isin-lolon, liu-liu órgaun reprodutiva sira, atu nune’e oan sira bele proteze-an husi isin-rua sedu, nune’e oan sira bele komprende kona-bá edukasaun seksuál.

“Husi prespetiva sosiál nian, ita presiza haree kauza husi tanba saída mak feto sira soe bebé, dalabarak ita-nia sosiedade sempre fó sala de’it ba feto ne’ebé soe bebé, maibé ita nunka buka hatene, husi ema nain-rua nia hamutuk relasaun ida mak hetan bebé ne’e, entaun aman sira ne’ebé komete relasaun ho feto ne’e nia responsabilidade to’o iha ne’ebé, tanba sa mak sosiedade sempre fó sala de’it mak feto, ita la hatene feto nia problema, tanba sa mak soe bebé ne’e, bele mós tanba bebé ne’ebé nia hetan mai husi kauza krime insestu, bele mós mai husi violensia seksuál, bele mós mai husi buat ne’ebé nia rasik hakarak, maibé tanba nia laiha forsa fízika, forsa psikolójika no forsa ekonómika, nia dependensia hela ba ema seluk no ema ne’e rasik obriga nia, nune’e dalaruma nia monu ba sala no hetan bebé, entaun sosiedade presiza buka hatene kauza husi kazu sira soe bebé ne’e antes julga feto ne’e”.

“Ida seluk mak ita presiza kuda ona edukasaun seksuál ba idade joven, liu-liu ba sira ne’ebé mak bainhira akontese mudansa iha sira-nia fízika, feto no mane, ita presiza fó hanoin ona ba sira (joven) kona-bá funsaun husi ita-nia órgaun reprodutiva sira, kuandu iha ona mudansa fízika, liu-liu hanesan feto sira ne’ebé mak tama ona idade produtivu, inan-aman presiza eduka sira no koalia ba sira kona-bá mudansa iha isin loloon sira”, tenik Vise Prezidente PN ne’e.

Nia akresenta, atu nune’e sira bele proteze sira-nia-an atu labele kualker ema ida bele halo abuzu no kuandu halo abuzu bele loke dalan atu hetan isin-rua sedu, ida ne’e inan-aman tenke ko’alia nakloke, inklui mós edukasaun, iha eskola, liu-liu matériá biolójia, profesór sira presiza esplika ho klaru kona-bá konteúdu biolójia no liu-liu matéria saúde reprodusaun ni’an.

“Tanba ne’e prevene isin-rua sedu, responsabilidade morál parte hotu-hotu ni’an, hanesan igreja, Estadu, família, sosiedade no komponente hotu ne’ebé servisu hodi luta ba igualdade jéneru, parte ida mós atu oinsa hapara joven sira ne’ebé isin-rua sedu”, informa Maria.

Alende ne’e, Prezidente Rede Feto, Judit Diaz Ximenes, akresenta, Rede Feto ho nia parseiru sei kontinua buka tuir kauza ka fukun husi kazu soe bebé ne’ebé kontinua akontese iha fatin-fatin.

“Kona-bá kazu soe bebé ne’e ikus ne’e ladun, maibé iha tinan ida no rua ba kotuk ne’e trend maka’as mak kazu soe bebé, tanba ne’e ita kontinua buka oinsa mak hatene tuir katak nia fukun loloos ne’e mak saída no ninia abut ne’e mak saída, tanba ne’e mak fenomena ida soe bebé ne’e kontinua iha, depois mak ita sensibiliza no eduka ita nia sosiedade katak, soe bebé ne’e parte ida husi kontra direitu umanu, tanba labarik ida, kuandu sai ona ema, mezmu sei iha inan nia kabun mós ema ne’e nia direitu fundamentál ne’e iha tiha ona, ne’e duni ida ne’e ita  presiza sosializa maka’as liu tan, liu-liu aprosimasaun ho parte hotu, hanesan igreja mós atu hola nia papél”, Judit realsa.

Antes ne’e, mosu fenomena oi-oin kona-bá soe bebé, liu-liu munisipíu Díli ne’ebé akontese ona iha fatin barak, bairu sira iha sidade Díli, hanesan akontese iha semana kotuk, komunidade hetan bebé ida, maibé ho kondisaun ne’ebé labele salva ona vida. avi/say

Leave a Reply

Your email address will not be published. Required fields are marked *