KE-KSDS rekomenda ba PR dekreta tan EE ba da-neen

Chefe Casa Civíl, Francisco Maria de Vasconcelos, hateten, liu husi reuniaun Konsellu Estadu (KE) no Konsellu Superior Defeza no Seguransa (KSDS), rekomenda ba Prezidente Repúblika (PR), Francisco Guterres Lú Olo atu dekreta tan Estadu Emerjénsia (EE) ba da-neen, hodi kontinua asegura povu no nasaun husi COVID-19.  

“Ha’u hakarak fó sai ba ita bo’ot sira katak, reuniaun Konsellu Superior Defeza Seguransa, foin dau-daun mak remata Reuniaun Konsellu Estadu, Konsellu rua ne’e rekomenda ba PR, Francisco Guterres Lú Olo, atu haruka pedidu Governu nian ba Parlamentu Nasional, atu husu Parlamentu prolonga EE ba da-neen”, Chefe Casa Civíl ne’e ba jornalista sira, Kuarta (30/09/2020).

Nia afirma, medida hotu hanesan pedidu uluk, maibe iha fronteira mak restridu liu tan atu prevene para tama-sai ilegal sira ne’e, no mos kuidadu tebes sidadaun sira atu labele hadaet moras ne’e, ne’e mak ohin desizaun husi Konsellu Estadu no Konsellu Superior Defeza no Seguransa.

“Posivelmente orsida lae aban husi Prezidensia Repúblika sei haruka ba Parlamentu Nasional, EE em prinisipiu hanesan ho anterior, agora medidas ba movimentasaun ne’e mak tenki restridu liu, liu-liu hanesan iha fronteira, para evita ema lao tama-sai ilegal, ne’e para bele posivel lori mos virus ne’e, depois mos medidas ba kuarentena sira sei restridu liu tan, para hotu hotu kumpri regra ne’ebé iha ona”, subliña Francisco Vasconcelos.

Alende ne’e, Díretor Ezekutivu FONGTIL, Daniel Santos Carmo, hatete, EE ba kotuk da-tolu, da-haat no lima ni’an sira ne’e mai, iha medidas sira bazeia ba rekomendasaun saúde, Ministériu Saúde nian introdus, maibe haree iha prátika medidas sira ne’e la aplika.

“Ezemplu mak agora ne’e ema la uza máskara, ema la fase-liman, loja sira la tau ona bee ba fase, distansiamentu fíziku ne’e ema la kumpri, liu liu ema sira tama iha kuarentena, sira la kumpri ona kuarentena dalaruma iha ne’eba kondisaun fasilidade kuarentena mos sai problema, ema sira iha ne’eba mos la kumpri buat ida kuarentena, tur hamutuk joga bola tesi lia, pior liu tan mak ekipa vijilansia, Ministériu Saúde ho PNTL la halo ona seguransa máximu, atu kontrola sidadaun sira iha kuarentena. Medida iha, maibe nia aplikasaun mak seidauk forte, tanba failansu ne’e mai husi ekipa vijilansia lídera husi Ministériu Saúde nia atuasaun iha terenu ita haree ladun, laiha ona edukasaun, sensibilizasaun ba, ita hanoin katak ema sira pozitivu ne’e,  realidade moras iha duni, no ema sira ne’e husi prosesu ida mak detekta, katak sira iha kuarentena, iha sintomas ba iha laboratóriu, ita nia preokupasaun mak kredibilidade laboratóriu, oinsa mak laboratóriu hatete pozitivu, que ita dehan katak ne’e pozitivu, entaun oinsa mak laboratóriu, Ministériu Saúde, Governu mos bele,  counter informasaun sira ne’ebé hatete dehan buat ne’e laloos ka halimar ida, ho evidensia médiku tuir siénsia ba públiku atu bele hatene katak loos duni buat ne’e iha”, tenik Daniel. Oly