LABEH husu Estadu harii Tribunal de Contas iha TL

Diretór Ezekutivu Lalenok Ba Ema Hotu (LABEH), Christopher Henry Samson, husu  Governu atu harii Tribunal de Contas iha Timor-Leste (TL), nune’e bele tau matan ba kazu korupsaun iha Timor-Leste.

Christopher Henry Samson hato’o lia hirak ne’e liu husi Konferénsia ba Imprensa iha Edifísiu LABEH, Comoro, Díli, Segunda (7/9/2020).

Christopher hateten, iha fulan Maiu, tinan 2004, Estadu estabelese  PDHJ bazeia ba Konstituisaun RDTL estipula iha artigu 27. Estadu harii PDHJ ho nia misaun  tolu mak hanesan  promove Governasaun Diak, Direitu Umanu  no Kombate Korupsaun.

Tuir Christopher, presiza hadia didiak kapasidade instituisaun sira atu kumpri sira-nia mandatu ho forma efisiénsia no efikás iha area investigasaun ba kazu kriminal.

“Harii Instituisaun  hira ne’ebé mak hakerek ona iha konstituisaun no iha lei mak seidauk harii liu-liu Supremu Tribunal Justisa, Tribunal Superior Administrativu Fiskal no Contas, la’ós ba Tribunal nia okos fali no husu ba Estadu atu hadia didiak kapasidade instituisaun sira atu kumpri sira-nia mandatu ho forma efisiente no efikás husi orgaun sira ho kbiit iha área investigasaun kriminal hodi tulun KAK nia servisu iha área investigasaun inklui hadia didiak sistema jestaun no prosedimentu kona-ba material planeamentu orsamentasaun, jestaun finanseira, aprovizionamentu, lojístika no rekursu ema nian”,hateten  Christopher Henry Samson.

Diretór Ezekutivu LABEH ne’e mos husu  Komisaun Anti Korrupsaun atu halo esforsu maka’as hodi halo tradusaun ba lei Anti Korupsaun ba lian Tetun no Inglés.

Lei  prevensaun no Kombate Korupsaun aprova ona iha loron 20, fulan Jullu, tinan 2020 ho votu unanimidade, no lei ne’e hetan ona promulgasaun husi Prezidente Repúblika iha Loron 24, fulan Agostu, tinan ne’e, maibe lei ne’e rasik seidauk aplika tanba tuir regra sei liu fulan neen mak foin aplika lei refere. aba