JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PJR: PN tenke atualiza artigu balun iha lei aktu ilísitu droga

PJR: PN tenke atualiza artigu balun iha lei aktu ilísitu droga

Prokuradór Jerál Repúblika (PJR), José da Costa Ximenes, husu ba Parlamentu Nasionál (PN) atualiza artigu balun iha lei númeru 02/2017 ne’ebé atu penaliza autór sira ne’ebé importa matéria báziku ba droga.

PJR hato’o kestaun ne’e relasiona ho kazu materia bázika ba produsaun droga ne’ebé autoridade seguransa halo apreensaun iha tinan 2018, ho tonelada 161, ne’ebé ikus mai tribunál deside absolve arguidu sira.

“Ha’u la’ós dehan Alfándega nia servisu la di’ak lae, ema barak servisu di’ak ne’e mak ohin loron ita prende sasán sira ne’e, horibainhira ha’u aprezenta ona ba Primeiru Ministru (PM), atu atualiza la-lais matéria bázika ba droga, iha anexu “A” no anexu “C” para matéria sira hanesan ne’e atualiza la-lais, ha’u aviza hela de’it ba PN, ne’e atualiza la-lais naran katak ita haree iha nível mundiál halo nusa ne’e ita hein tau naran tipu sira ne’e tama, para ita bele kriminaliza, tanba ne’e ameasa boot ba ita-nia oan sira no estabilidade nasaun”, José Ximenes hafoin abertura atividade destroisaun matéria bázika ba droga, iha Kuartel Jerál PNTL, Caicoli-Díli, Kinta (10-09-2020).

Matéria báziku ba produsaun droga ne’e rasik autoridade seguransa hamutuk ho autoridade Alfándega halo apreensaun iha tinan 2018, iha Portu Díli hamutuk tonelada 160 no prosesu justisa desizaun tribunál iha tinan 2019 absolve arguidu nain tolu (3), tanba konsidera artigu 8 iha lei númeru 02/2017 la priense.

PJR-PNTL destroi matéria bázika ba produsaun

Prokuradoria Jerál Repúblika (PJR) hamutuk ho Polísia Nasionál Timor-Leste (PNTL) halo destroisaun matéria bázika ba produsaun droga hamutuk tonelada 160 iha suku Vatu-Voro, postu administrativu Maubara, munisípiu Liquiça, hafoin Tribunál Rekursu (TR) deside sasan bázika produsaun droga ne’e partense ba Estadu Timor-Leste atu halo destroisaun.

Lee hotu :   Filomeno Paixão: “Eis milísia nia oan iha F-FDTL ne’e la’os foin mak fó sai

Komandante Jerál (KomJer) PNTL, Faustino da Costa, hateten, destroisaun ba matéria bázika produsaun droga ne’e iha nível mundiál, liu-liu iha Sudeste Aziátiku úniku Timor-Leste mak foin primeira vez halo apreensaun no destroisaun ba matéria bázika ne’e kuaze 160 tonelada.

Faustino afirma, sasan sira ne’e proibidu tebes ba vida umana, tanba bele hamosu instabilidade iha teritóriu rasik no afeta ba dezenvolvimentu nasionál Timor-Leste.

“Bainhira autoridade seguransa la fó sira-nia esforsu tomak hodi asegura entrada sasan sira ne’e mak bele afeta ba kestaun estabilidade no seguransa, tanba bele estraga mentalidade, hahalok ita-nia komunidade no mós joven sira-nia mentál, nune’e sasan sira ne’e asegura durante tempu naruk iha Komandu Jerál PNTL, tanba polísia sira mós nu’udár ko-autor ba prosesu sira ne’ebé na’in ba prosesu tomak krime ni’an mak Ministériu Públiku (MP)”, KomJer PNTL, Faustino da Costa iha Kuarter Jerál PNTL Caicoli-Díli, Kinta (10-09-2020).

Prokuradór Jerál Repúblika (PJR), José da Costa Ximenes, akresenta, destroisaun ne’e parte MP hamutuk ho PCIC, PNSIK no Komandu Jerál PNTL hetan autorizasaun husi Ministériu Saúde (MS) atu halo destroisaun do’ok husi komunidade sira-nia hela fatin, tanba perigu ba saúde públika no ambiente.

Nune’e Prokuradór ne’e mós esklarese, kona-bá sasán báziku sira ne’e iha desizaun primeira instánsia absolve arguidu nain tolu no sasan sira ne’e devolve fila-fali ba arguidu sira, ho nune’e parte MP rekore kedas rekursu ba TR no tribunál deside fali sasan sira ne’e favorese ba Estadu.

“Hanesan ohin ha’u hateten, iha 28 de Agostu 2019 wainhira tribunál deside katak, arguidu sira absolve husi krime ne’ebé MP akuza, depois ordena tribunál katak sasan sira ne’e entrega fali ba arguidu sira, tanba ne’e MP la konkorda hodi rekore fali rekursu ba TR no ikus mai deside matéria sira ne’e ba Estadu hodi halo destroisaun. Ha’u mós ohin dehan Timor-Leste seidauk iha fábrika, laiha indústria”, hateten PJR ne’e.

Lee hotu :   José Ximenes: MP deteta Alfándega-MT sai risku ba krime

Xefe Ekipa ba destroisaun, Prokuradóra Lídia Soares, hateten, sasan sira ne’e iha substánsia kímiku ne’ebé bele afeta ba saúde públika, tanba ne’e mak ekipa konjunta kompostu hosi PJR, PNTL, PCIC, MJ, deside fatin destroisaun ne’e do’ok husi komunidade.

“Kona-bá rai ida ne’e, ami servisu hamutuk ho Terras no Propriedade husi munisípiu no nasionál no hetan autorizasaun husi MJ kona-bá rai ida ne’e, kona-bá medida tuir ekipa tékniku ni’an mak medida ne’e nia luan metru 7 no naruk metro 6, kona-bá atu hamate nia kímiku tuir teste laboratóriu katak, nia manas ne’e 400 graus, depois sunu hotu mak hakoi”, tenik Prokuradóra ne’e.

Tuir planu atividade destroisaun ne’e kuaze loron rua, tanba matéria báziku ne’e ho kuantidade ne’ebé boot, hamutuk kontentór 9 no nia tonelada 160.

Iha loron 8, fulan Fevereiru, tinan 2018, autoridade Polísia Timor-Leste hamutuk ho Badan Narkotik Nasional (BNN-Indonesia) halo teste laboratóriu ba materia prima hirak ne’e iha Indonézia no rezultadu hatudu katak husi ai-moruk hirak ne’e hanesan Acetaminopen, Caffeine, Carisprodol, Tramadol, Miconazole, Meloxicam, Simethicone, Allopurinol, Ausinofilia, Dapoxetine, Aminopyridine, Dexamethasone, Subtramine, Piroxicam fó indikasaun hanesan analjésiku ne’ebé bele hamosu reasaun alerjia, tee-been, ulun-moras, isin-manas, kabun-moras, isin-mean, zombie, matan-dukur, la hakmatek, bilan, delirium kma’an, muta, iritasaun gástrika, katar, ibun-maran, laran la hakmatek, hamro’ok, sente kolen, iritasaun matan, dezmaia no halo kakorok no inus moras no husi efeitu ai-moruk hirak ne’e identifika katak materia prima ho naran Carisprodol,  nu’udár substánsia ida husi droga, tanba ninia efeitu fó reasaun maka’as hasoru ema nia isin lolon, bele hamosu depresaun no wainhira materia prima Paracetamol, Carisprodol no Caffein kahur hamutuk bele produs ai-moruk ho naran PCC, wainhira konsumu bele efeitu imajinasaun aas, halusinasaun, kontente hela de’it no halo konsumidór dependensia ba ai-moruk ne’e. san

Add to Comments Here!!!!

error: Content is protected.
Secured By miniOrange
You might also like:
Kontrola movimentu ilegál iha fronteira, Somotxo: Governu presiza monta CCTV

Prezidente komisaun B Parlamentu Nasionál (PN),...

Lei FP la fó dalan ba Governu uza lei transferénsia estraordinária foti osan

Prezidente Konsellu Konsultivu Fundu Petrolíferu (KKFP),...

Bernardino de Cristo: Prezensa grupu Rin Besi Asu Tali Be Korente iha Madohi ilegál

Xefe Suku Madohi, Bernardino de Cristo...

Close