Preokupa situasaun rai-laran, Falur: Líder nasionál sira seidauk husik kargu

Vise Xefe Estadu Maiór FALINTIL-Forsa Defeza Timor-Leste (F-FDTL), Brigadeiru Jeneral Falur Rate Laek, hateten, líder nasionál sira seidauk husik kargu, tanba preokupa ho situasaun rai-laran ne’ebé dau-daun ne’e halo públiku preokupadu.

“Ami hakarak ditadura karik, ami la husik uluk ema sunu ami nia uma, tun-sa’e iha tinan 2006, ami hakarak ditadura karik, ami sei la sai komandante to’o agora, ami sai kleur ona,” dehan, Vise Xefe Estadu Maiór F-FDTL ne’e bainhira partisipa Programa Grande Entrevista, iha studio 2 GMN, Bebora-Díli, Kinta (03/09/2020).

Falur subliña, antes ne’e líder nasionál sira planu atu husik ona kargu ne’ebé dau-daun ne’e iha, hahú husi tinan 2006-2014.

“Ami nia planu dezde 2006 ami atu sai ona, balun sai iha 2007, balun iha 2008, balun iha 2009, no ikus liu mak Primeiru Ministru Taur Matan Ruak, iha tinan 2014, planu ne’e la’os halo iha ukun-an, maibé halo iha Ai-Laran,” tenik, Falur Rate Laek.

Brigadeiru Jeneral ne’e esplika, kuandu kazu ki’ik oan hanesan ne’e mak bei-beik, ne’e sai preokupasaun komunidade nian, nune’e halo sira mós preokupa bele polítika han malu no hatun malu, maibé instituisaun F-FDTL no PNTL sei metin.

“Ami sei la monu ba manobra polítika nian, iha akuzasaun barak katak, ami ne’e sai ditador, ami mak hakarak ditadura karik, uluk ami la hela iha akontonamentu kuandu milisi dezarmadu oho populasaun,” afirma, Vise Xefe Estadu Maior F-FDTL ne’e.

Falur Rate Laek hatutan, sira nia parte komprende, tanba kleur demais iha pozisaun ida hanesan dadaun ne’e, tanba ne’e monu ba sala rua, ne’ebé mak sira komete, rotina de abitus no autoritáriu.

“Tanba ne’e foin dadauk ami nain rua Jeneral Lere, tur hamutuk ita nia kareira ne’e lakon, ultimo kapítulo ne’e dalaruma ita ba liu husi prizaun, hafoin ba rai kuak, tanba situasaun ida hanesan dau-daun ne’e,” afirma, Brigadeiru Jeneral Falur. Cin