Tempu badak Alkatiri sei keixa Ângela Freitas ba MP

Xefe bankada FRETILIN, deputadu Francisco Miranda Branco, informa, iha tempu badak Sekretáriu Jerál partidu Fretilin, Marí Alaktiri, sei keixa Ângela Freitas ba Ministériu Públiku (MP), tanba konsidera halo akuzasaun falsu.

Akuzasaun hasoru Marí Alkatiri katak, uza osan millaun USD 700 ne’ebé aloka ba Orsamentu Rejiaun Administrativa Espesiál Oe-Cusse Ambeno (RAEOA) nini’an.

“Lolos ne’e orsamentu ne’ebé aloka ba RAEOA ne’e la to’o USD 500 milloens. Tanba ne’e iha tempu badak sei aprezenta keixa kontra nia (Ângela) ne’ebé iha nia deklarasaun hateten Dr. Marí uza osan Estadu ba nia aproveitu rasik, depozita osan la hatene nia paradeiru”, afirma deputadu Francisco Branco, ba jornalista iha PN, Segunda (28/09/2020).

Maibe ida ne’e de’it nia rezultadu hotu-hotu bele haree no apresia, tanba ne’e nu’udar figura polítika no líder FRETILIN ni’an, sira-nia hanoin akuzasuan ne’e grave.

Kona-bá deklarasaun Ângela Freitas ne’ebé husu INTERPOL atu kaptura Marí Alkatiri, deputadu FRETILIN ne’e ho hamnasa hateten, ida ne’e bosok no sei la akontese. “Ida ne-ne’e lia bosok”, afirma deputadu FRETILIN ne’e.

Antes ne’e, porta vóz Grupu Rezisténsia Nasionál Defende Justisa no Konstituisaun RDTL, Ângela Freitas, liu husi konferénsia ba imprensa, akuza Sekretáriu Jerál Fretilin, kométe iregularidade barak iha RAEOA, nune’e mós akuza Marí Alkatiri mak lidera polítika no grupu Skylight. say