TL sei asina akordu ho EUA reabilita aeroportu Baucau

Primeiru Ministru (PM), Taur Matan Ruak, Tersa (09-09), konvoka enkontru ho Ministru Prezidénsia Konsellu Minitstru (MPKM), Fidelis Magalhães, Ministru Defeza (MD), Filomeno Paixão no Ministra Negosiu Estranjeiru no Kooperasaun (MNEK), Adaljiza Magno, hodi koalia kona-ba planu reabilitasaun aeroportu Baucau, ne’ebé Estadu Unidu Amérika (EUA) mak sei reabilita.

Filomeno Paixão, esplika, Governu Timor-Leste (TL) diskute hela ho EUA atu asina akordu ba reabilitasaun aeroportu Baucau. Alén de asina akordu ho EUA, Governu Timor-Leste (TL) sei selebra akordu ho Austrália atu halo patrullamentu konjuntu ho forsa Austrália iha Kosta Sul.

“Kona-ba dezenvolvimentu ita-nia forsa aérea no mos ita-nia marina, koalia kona-ba memorandu sira ne’ebé ita halo karik ho EUA ho Austrália ho kompañia sira seluk doadores seluk kona-ba oinsa mak dezenvolve ita-nia aeroportu Baucau, halo nusa mak kontrolu ba iha parte seguransa marítima liu-liu iha Kosta Sul”, hatete Filomeno Paixão hafoin enkontru iha Palásiu Governu.

Filomeno Paixão, hatete, se reabilitasaun ba aeroportu ne’e lais liu, diak liu, tamba ho EUA Timor-Leste iha tiha ona entendimentu ida falta deit atu halo akordu para depois sira fó hatene ba sira-nia intensaun saida atu parte rua tur hodi tau hamutuk ideia hodi halo aeroportu Baucau ne’e hanesan ne’ebé.

“Maibe EUA hatete ona katak aeroportu Baucau ne’e Timor-Leste nian Governu mak hatene atu halo aeroportu sai hanesan ne’ebé ami laiha buat ida atu mete iha ne’e, ami so hakarak ajuda deit F-FDTL para tau fatin ne’e iha ne’eba”, hatete MD ne’e.

Governante ne’e hatete orsamentu ba reabilitasaun aeroportu refere hamutuk USD tokon sanulu ne’ebé oferese husi Governu EUA. Oct