Kazu omisídiu iha Liquiça sei iha prosesu autópsia iha HNGV

FOTO: MedSos

Kazu omisídiu ne’ebé akontese iha área mota Laclo, suku Dato, postu administrativu Liquiça, munisípiu Liquiça, dadaun ne’e mate-isin iha Hospital Nacional Guido Valadares (HNGV) Díli, hodi submete ba prosesu autópsia.

Família matebian, Saturninho dos Santos, haktuir, kazu ne’e akontese bainhira deskonfia grupu balun mak konvida matebian Joaquim dos Santos ba hemu tua hamutuk, hafoin sira sona matebian ho tudik husi kabás parte karuk.

“Lorokraik ne’e ha’u sa’e ba ojek tia ida, maibé ha’u ba to’o iha dalan klaran ojek balun tun mai tahan tiha ha’u iha ne’ebá, sira tahan ha’u hanoin atu problema ho ha’u, ne’ebé sira hateten dehan o atu ba ne’ebé? ha’u dehan atu ba ojek, entaun sira dehan ó nia maun sira oho mate tiha ne’ebá ne’e. Maibé ha’u la hatene problema saída mak sira oho. Ba to’o iha ne’ebá sira pinera rai-henek iha ne’ebá hotu. Maibé dehan ida naran hanesan ne’e mak bolu nia ba hemu tua iha ne’ebá. Hemu tua dehan saída-saída ne’e hakfodak sira oho tiha ona”, Família matebian ne’e ba jornalista sira iha HNGV, Sesta (23/10/2020).

Tanba ne’e, parte família husu ba autoridade kompetente atu buka tuir autór ne’ebé envolve iha kazu omisídiu ne’e, hodi prosesa tuir dalan legál.

“Ami husu ba autoridade kompetente atu hodi buka tuir autór no kriminozu ne’e, hodi prosesu tuir ba oin”, termina Saturninho.

Kazu omisídiu ne’e akontese, iha loron 22, fulan ne’e, mais ou menus tuku 18:00 kalan.

Ho kazu ne’e, GMN konfirma ho Komandante PNTL munisípiu Liquiça, liu husi telefone Komandante ne’e esplika, dau-daun ne’e polísia detein ona suspeitu ida ne’ebé deskonfia envolve iha kazu ne’e. san