Loke jogu ilegál, PSIK detein sidadaun Xinés ida

Polísia Sientífika Investigasaun Kriminál (PCIC-Sigla Português) ezekuta mandadu buska husi Tribunál Distritál Díli (TDD) ba jogu casino iha Royal Club Audian.

Durante buska, ekipa ne’ebé lidera husi Xefe Seksaun Sentrál, Floriano Serrano, konsege prende dokumentu jogu nian ne’ebé deskonfia ilegál, inklui sasan balun ne’ebé konstitui hanesan objetu husi krime jogu ilísitu nian.

“PCIC simu delegasaun kompeténsia husi tribunál hodi ezekuta ba mandadu buska ba iha jogu slot mesin ne’ebé deskonfia maka’as ilegál ne’ebé explora iha Audian ne’e. Iha operasaun buska ne’e nia laran ita konsege apaña tan krime balun konsidera hanesan flagrante delitu kona-bá explorasaun jogu ilísitu nian no ita mai iha ne’e atividade jogu la’o hela no tuir informasaun ne’ebé iha katak jogu refere ilísitamente no nia prova sira ne’ebé ita rekolla mak osan sira ne’ebé iha mákina laran. Iha ne’e iha Xineza na’in haat, mane tolu, feto ida ho funsionáriu sira ne’ebé servisu iha ne’e ita sei hodi hotu ba halo identifikasaun iha PCIC nia edifísiu, balun bele 12 de tempo balun bele submete ba prosesu 72 oras bele ba prosesu flagrante delitu nian”, hatete Xefe Investigasaun PCIC, José Maria da Silva ba GMN hafoin remata buska iha Audian, Sesta (16/10/2020).

Hafoin termina buska, PCIC halo kedas identifikasaun ba suspeitu na’in ha’at ho inisiál LJ, HYJ, SLJ no FXF.

Entretantu iha identifikasaun ne’e, PCIC konsege detein kedas suspeitu LJ nu’udár na’in ba loke jogu “casino” ne’e, hodi submete ba prosesu Primeiru Interogatóriu (PI) iha TDD, tanba deskonfia jogu refere ilegál no suspeitu na’in tolu seluk presta de’it deklarasaun ba PCIC. san