OJE 2021 MD tau prioridade ba AM

Ministru Defeza, Filomeno Paixão, hatete, ho Orsamentu Jerál Estadu (OJE) tinan 2021 ba Ministériu Defeza (MD) prioridade liu ba Autoridade Marítima (AM) no sei konstroi sede marítima iha Hera.

Sede marítima ne’e rasik sei kompleta ho edifísiu, nune’e fasilita membru sira hodi halo servisu ho di’ak iha futuru.

Alende ne’e, sei estabelese konseitu estratéjiku liu-liu sei kria mós portál sistema dezenvolvimentu kona-bá despozitu forsa nian no sei haree mós kolokasaun forsa ba fronteira ba Kosta Sul no Kosta Norte.

“Prioridade ha’u tau defeza mak AM, hanesan ita hatene AM aprovada tiha ona ho nia sistema AM ita hatene atende jerál saída mak kona-bá AM, ita hala’o tiha ona primeira reuniaun ministériu kompetente relevante AM ne’e ba oin, tanba ne’e mak ita hanoin iha 2021 ita atu hatama duni osan halo sede komandante naval iha Hera”, Ministru Defeza ne’e iha Palásiu Prezidensiál Nicolau Lobato, Bairo-Pite, Tersa (13/10/2020).

Tuir Governante ne’e, AM estabelese la’ós MD de’it, maibé mós ba ministériu relevante sira ne’ebé iha interese ba servisu iha tasi laran.

Governu la presiza sosa tan ró mariña barak, tanba F-FDTL iha ró-ahi rasik hodi halo atendimentu ba servisu iha Kosta Sul no zona ekonomia eskluziva.

Kona-bá atu halo navegasaun iha Kosta Sul hodi halo kontrolu ba tasi iha Kosta Sul, Governu Timor-Leste iha hela andamentu ho Estadu Austrália, atu halo patrullamentu iha parte sul nian hodi kontrola movimentu ilegál.

Dau-daun ne’e, parte defeza estabelese komponente tolu (3), hanesan komponente terestre, komponente navál no komponente áereo.

Alende ne’e, Ministru Defeza mós informa, membru F-FDTL destaka iha fronteira seidauk máximu. Tanba ne’e, tinan oin sei halo tan rekrutamentu hodi haforsa seguransa iha fronteira, nune’e bele diminui movimentu ilegál. Ina