PNTL ho F-FDTL identifika pesoál seguransa fasilita sidadaun tama-sai ilegál

Xefe Estadu Maior FALINTIL-Forsa Defeza Timor-Leste (F-FDTL), Major Jeneral Lere Anan Timur, hateten, liu husi reuniaun F-FDTL ho Polísia Nasional Timor-Leste (PNTL) identifika ona iha pesoál seguransa balun mak fasilita sidadaun sira tama-sai ilegál iha fronteira.

“Informa situasaun rai-laran, situasaun iha fronteira ladun di’ak, tanba ilegais mak barak, mas situasaun rai-laran kona-ba konflitu arte marsiais no buat sira ne’e, ita haree ba hotu-hotu tauk Corona no hotu-hotu tauk mate, problema iha uitoan, tanba ita-nia ema ne’ebé halo seguransa fronteira mak dala ruma viola”, dehan Lere Anan Timur ba Jornalista sira (07/10/2020), iha Palaáiu Prezidensial Nicolau Lobato, Bairo Píte, Díli.

Nia saleinta, foin la-lais nia ho komandante Polísia reuniaun haree iha ona lista lubuk ida, ema hirak ne’ebé envolve ba iha ilegál sira ne’e.

“Sa medida mak toma, balun duni sai no balun tenke transfere, balun ba Manatuto, Baucau, Viqueque no Lospalos, sira labele besik fronteira. Liu-liu iha fronteira, ami-nia forsa armada mós hanesan ne’e, alerta bei-beik ba komandante sira atu atensaun ho ita-nia elementu sira, ne’ebé koloka iha fronteira, ida Unidade Patrullamentu Fronteira (UPF) diferente ho ami nian ne’e tanba saída? sira iha ne’eba tinan ba tinan, la muda, entaun sira manan ámbitu aat ida halo ilegais sira ne’e”, hatutan Lere.

Nia akresenta, sistema iha F-FDTL nian sempre muda, fulan rua ka fulan tolu halo rotasaun, ne’e mak sira-nia desizaun.

“Ha’u haree lista ne’e kuaze ema nain 10 resin, komandante balun, ajente balun que fasilita, no sira ne’e naran iha hotu ona, dalaruma ida, sira duni sai ona, sira seluk dalaruma kma’an komandante dehan atu transfere ba parte lorosa’e nian labele besik fronteira, sei halo ilegál, halo ilegál seluk labele fasilita ba fronteira”, tenik Lere. Oly