Semináriu sientífiku iha UNPAZ, Julio Crispim: VIII Governu laiha kapasidade jurídika

Jurista Timor-Oan, Julio Crispim, esplika, polítikamente durante ne’e VIII Governu la’o iha parte jurídikamente konstituisonál presiza kestiona, tanba plataforma intendimentu ba lei partidu polítiku laiha baze.

“Iha ne’e ha’u konsidera VIII Governu ne’e iha personalidade jurídika, maibé laiha kapasidade jurídika ligadu ba atu dehan katak nia laiha kapasidade jurídika sujetiva, tanba ninia membru la to’o i membru ida to’o agora ne’e mai husi plataforma intendimentu ne’ebé mak jurídikamente ne’e laiha, konstituisionalmente laiha, iha mak konstituisionál, lei partidu polítiku ko’alia kona-bá koligasaun ka asosiasaun polítika, kona-bá plataforma intendimentu polítiku ne’e laiha, ne’e duni ninia baze jurídiku laiha, baze plataforma mós laiha, ida ne’e aranja polítiku de’it atu rezolve la-lais ita-nia situasaun ne’ebé enfrenta,” esplika, oradór Julio Crispim iha semináriu sientífiku ne’ebe realiza iha salaun José Casimiro UNPAZ, Sábadu (3/10/2020).

Iha fatin hanesan, Reitór Universidade da Paz (UNPAZ), Adolmando Soares Amaral, hatete, objetivu husi semináriu ne’e atu sivita akadémika sira bele hetan informasaun iha aspetu polítika, ekonomia, jurídika no impaktu sosiál husi governasaun atuál, alende ne’e sai hanesan mós bukae ida ba estudante sira iha futuru, tanba liu husi semináriu refere bele hasa’e liu tan estudante sira nia koñesimentu.

“Tuir tema ne’ebé iha ita atu halo análiza uitoan kona-bá dezempeñu atividade rezultadu Governu ni’an haree ba diskusaun públiku ema hot-hotu ho ninia opiniaun ema hotu-hotu halo komentáriu husi komentáriu sira ne’e hotu, ita haree hanesan Governu mak sai fali alvu ba komentáriu sira ne’e, entaun ita buka atu hatene sera que situasaun agora la’o ne’e, tanba Governu ou parte sira seluk mós i ohin ita rona katak responsabilidade ba ida ne’e la’ós parte Governu de’it, Governu ne’e elementu ki’ik ida iha prosesu ida ne’e, entaun ita buka atu komprende ida ne’e tenke liu husi semináriu, semináriu ne’e mak ami konvida ensinu superiór privadu no públiku sira para depois ho hanoin sira ne’e hotu, ha’u fiar katak aban ba oin sira bele ko’alia buat ne’ebé lo’os,” hatete, Reitór UNPAZ, Adolmando.

Oradór ba iha semináriu ne’e loloos ne’e kompostu husi membru Governu, deputadu Parlamentu Nasionál (PN), maibé oradór husi parte Governu no PN la marka prezensa, tanba okupadu ho servisu seluk, ho nune’e ekonomista no jurista sira mak sai oradór iha eventu ne’e no partisipa iha semináriu ne’e husi estudante UNTL, ICR, UNITAL, IOB, DIT no selu-seluk tan. Jen