Uza kareta sama bandeira RDTL, PNTL detein sidadaun Filipina na’in tolu

Polísia Nasionál Timor-Leste (PNTL) detein sidadaun Filipina na’in tolu, tanba lori kareta sama  bandeira RDTL.

Iha Domingu (25/10) mais ou menus tuku 08:00 dadersan oras Timor-Leste, suspeita na’in tolu husi sidadaun Filipina treinu kareta iha área Tasi Tolu, lori bandeira RDTL tidin iha rai, hafoin lori kareta     tama no sai, ikus mai hodi kareta nia roda sama bandeira ne’e monu ba rai.

Kazu ne’e akontese iha Tasi Tolu, aldeia 12 de Outobro, suku Comoro, postu administrátivu Dom Aleixo, munisípiu Díli.

Ho aktu ne’e, abitante  ida  iha Tasi Tolu hetan hodi hapara kedas sira hirak ne’ebé treinu kareta ne’e hodi hateten, ne’e bandeira Timor-Leste, labele lori kareta sama. Hafoin kontaktu ba Polísia to’o iha fatin akontesimentu hodi  kaptura suspeitu na’in  tolu, lori mai iha Eskuadra Dom Aleixo, hodi submete ba  prosesu investigasaun.

“Ha’u ho ha’u-nia ibu haree fila-fali ema sira tau bandeira ida iha roda oin no ida iha roda kotuk ne’ebé sira hodi treinu kareta, depois ha’u haree husi dook koor mean ho metan, entaun sira ba sama bandera, ha’u haree hodi ba losu bandeira  ne’e,  depois suspeitu sira ko’alia mai ho liafuan Ingles mai dehan ami la hatene”, esplika sasin Rafael Amaral ba jornalista sira, Domingu (25/10/2020), iha Eskuadra Dom Aleixo.

Suspeitu na’in tolu ho inisiál MD, JDG, MN, durante ne’e servisu  área lojistika iha East Timor Trading.

Tuir informasaun Polísia, sidadaun nain tolu ne’e  sei detein oras 72  iha sela, hafoin submete ba primeiru interogatóriu iha Tribunal Distritál Díli. avi