Cedelízia ameasa lori PPN ba tribunál

Sekretária Jerál Parlamentu Nasionál (PN) sesante, Cedelízia Faria dos Santos, ameasa lori Prezidente Parlamentu Nasionál (PPN), Aniceto Guterres ba  tribunál, tanba konsidera desizaun destituisaun ba nia ne’e la justu.

“Ohin dader ha’u simu despaixu husi ita-nia PPN kona-bá halo destituisaun, razaun tanba Sekretária la fasilita plenária iha loron 18 no 19 iha fulan mai liu ba, ha’u la fasilita no problema eletrisidade, Ha’u hanoin razaun ne’e la justu, prosesu administrativa mós ha’u labele simu notifikasaun agora sai kedas ne’e la’ós krime”, Sekretária Jerál PN sesante ne’e iha PN, Tersa (24-11-2020).

Cedelízia klarifika, iha loron 18 no 19, fulan Maiu liu ba PPN sesante, Arão Noe Amáral, bai-bain atu halo plenária iha ajenda husi Prezidente rasik mak Sekretária Jerál bele halo no Sekretária nia poder la jere to’o ba plenária.

“Ha’u sei lori prosesu ne’e ba oin nu’udár sidadaun ita-nia konstituisaun fó dalan, ha’u sei buka advogadu privadu, tribunál mak bele deside buat ne’e loos ou sala. Ha’u tama iha PN liu husi rekrutamentu rasik, la’ós partidu mak nomeia ha’u, maske troka Prezidente Parlamentu, maibé lejislativa ida ne’e seidauk troka, tanba ida ne’e mak sai mós ha’u nia razaun hotu“, tenik Sekretária Jerál PN sesante ne’e.

Liu husi komunikadu ne’ebé mak jornalista asesu husi Gabinete PPN,  Aniceto Guterres, hateten, liu husi despaixu númeru 30/2020/PPN, PPN  halo destituisaun ba Sekretária Jerál PN sesante, Cedelízia Faria dos Santos.

Destituisaun ne’e bazeia ba lei númeru 3 artigu 23, lei númeru 12/2017, loron 24, fulan Maiu, hateten, Sekretária Jerál bele destituidu, tanba justa kauza, defaktu iha duni justa kauza mak justifika PPN foti desizaun ida ne’e, iha ámbitu viola Lei Organizasaun Funsionamentu Administrasaun Parlamentár (LOFAP) no viola Rejimentu Parlamentu artigu 85.

Faktu seluk hatudu abuzu nia funsaun ka halo intervensaun ba kompeténsia Gabinete Seguransa nian ne’ebé tutela direta ba PPN, la dezempeña nia funsaun koordenasaun servisu regulár.

Alende ne’e mós iha loron 15, fulan Maiu, tinan 2020, fó instrusaun ba funsionáriu boikota funsionamentu normál plenária iha loron 18 no 19, fulan Maiu liu ba no la obedese orientasaun husi superiór.

Hafoin destituisaun ba Cedelízia Faria dos Santos, PPN Aniceto Guterres, hasa’i kedas despaixu númeru 31/2020/V/PPN, hodi nomeia Adelino Afonso de Jesus.

Entretantu, Cedelízia Faria dos Santos simu pose sai nu’udár Sekretária Jerál PN iha loron 13, fulan Setembru, tinan 2019. ety