JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Jestór EC-Telemor ba ona PP no Prezidente ANC sei ba PD

Jestór EC-Telemor ba ona PP no Prezidente ANC sei ba PD

Liu husi desizaun Primeiru Interogatóriu iha Sábadu semana ne’e, Tribunál Distritál Díli (TDD) aplika medida koasaun Prizaun Preventiva (PP) hasoru arguidu ho inisiál TVB no DP ne’ebé deskonfia iha relasaun servisu hodi fasilita internet ilegál husi satelite Indonézia ho kapasidade 600 Mega Bites, hodi fornese ba instituisaun Governu sira, inklui Komandu Polísia Nasionál Timor-Leste (PNTL).

Razaun tribunál aplika medida koasaun prizaun preventiva ne’e, tanba iha indísiu forte arguidu sira komete krime ne’e.

“Tribunál dehan ami nia kliente sira tenke hetan lisensa husi ANC hanesan Autoridade Nacional de Comunicações (ANC). Maibé ate agora ANC rasik seidauk hasa’i lisensa ba operadór Internet Service Provider (ISP) ne’e husi ANC mak seidauk hasa’i. Tanba ne’e mak ANC husu ba ISP sira hotu-hotu ba rejistu iha komérsiu iha Serviço de Registo e Verificação (SERVE)”, Advogadu Privadu, Pedro Aparício iha TDD Mandarin-Díli, Sábadu (28/11/2020).

Defeza ne’e argumenta, prosesu administrativu tomak kabe ba kompeténsia tomak ANC nian, maibé to’o agora empreza hirak ne’e seidauk rejistu.

“Agora tanba de’it ANC la fó lisensa, ne’e Ministériu Públiku (MP) nia hanoin, tribunál nia hanoin. Maibé prosesu administrativu ne’e ANC, tanba saída mak ANC to’o agora seidauk hasa’i, ne’e problema iha ANC nian, Governu. Importante mak atividade hotu-hotu ne’e selu taxa”, akresenta Defeza ne’e.

Maibé parte defeza la konkorda ho desizaun ne’e no sei halo rekursu ba tribunál ne’ebé aas liu, hodi tetu desizaun tribunál primeira instánsia.

“Ne’ebé Segunda nia prazu iha 15 dias, sura husi Segunda ami sei hato’o rekursu ba Tribunál Rekursu (TR), tanba ne’e la di’ak, afeta teb-tebes ba operadór telekomunikasaun sira iha ne’e ho ISP sira iha Timor”, termina nia.

Enkuantu kona-bá Police Line ka Fita Polísia ne’ebé dau-daun ne’e dada hela iha lokál krime iha Elite Computer (EC) sei kontinua dada nafatin, maibé iha Telemor hasa’i tiha ona.

MP akuza arguidu sira ho krime Burla Informátika Agravadu tuir previstu no punidu iha artigu 269, Krime Brankeamentu Kapitál, previstu iha artigu 313 no krime Fraude Fiskal previstu iha atrigu 314, husi Kódigu Penál Timor-Leste.

Arguidu TVB nu’udár Jestór Prinsipál Telemor Servisu Investigasaun Kriminál (SIK) detein iha nia servisu fatin, Timor Plaza CBD 4 no arguidu DP nu’udár Diretór Kompañia EC SIK detein iha ninia servisu fatin Colmera-Díli, Segunda (23/11) ne’e.

Prosesu Interogatóriu ne’e, prezide husi Juiza, Ercília da Silva, MP reprezenta husi Prokuradór, Matias Soares no Lídia Soares.

Arguidu sira hetan asisténsia legál husi Advogadu Privadu, Pedro Aparício, Lígia Araújo no Advogadu Internasionál, Duarte Carneiro.

Prezidente ANC sei ba PD

Prezidente Autoridade Nacional de Comunicações (ANC), Sábadu semana ne’e, mais ou menus tuku 06:15 lorokraik submete ona ba prosesu Primeiru Interogatóriu (PI) iha Tribunál Distritál Díli (TDD), tanba deskonfia relasaun ho kazu utilizasaun internet ilegál husi operadór Telekomunikasaun Telemor no Elite Computer.

PI ne’e hala’o durante loron rua hahú husi loron (28/11-29/11), maibé seidauk iha desizaun, nune’e adia ba Segunda (30/11) mais ou menus tuku 11:00 dader oras Timor-Leste, hodi rona desizaun.

Enkuantu ba loron daruak, iha faze alegasaun Ministériu Públiku (MP) husu tribunál atu aplika medida koasaun prizaun preventiva ba Prezidente ANC ho inisiál JOF.

No parte defeza iha alegasaun ne’e husu tribunál atu aplika de’it medida koasaun Prizaun Domisiliáriu (PD), tanba bazeia ba artigu 183 Kódigu Prosesu Penál kona-bá rekizitu Jerál.

Advogadu Privadu, Manuel Tilman, fiar tribunál sei la aplika medida ne’ebé todan ba nia kliente.

“Desizaun ida ne’e tenke ser justa, la’ós prejudika foinsa’e ida ba nia vida tomak, sidadaun nasionál. Tanba ida ne’e mak MP husu prizaun preventiva, ha’u dehan katak, nia sidadaun nasionál sei la hala’i ida, oan sei ki’ik, kaben hela iha Díli, nune’e ha’u husu buat ida bolu naran detensaun domisiliáriu, prizaun domisiliáriu (PD), katak limite duni ninia liberdade de movimentasaun iha nasaun laran, la’ós ba fali kadeia, maibé hela iha nia uma rasik”, Advogadu Privadu ne’e ba jornalista sira hafoin hakat sai husi sala julgamentu TDD, Mandarin-Díli, Domingu (29/11/2020).

Tuir konteúdu ne’ebé deskreve iha artigu 183 deskreve, exetu termu ba identidade no rezidénsia, medida-koasaun bele aplika de’it kuandu: A) arguidu hala’i, ka iha fundadu perigu ba arguidu atu hala’i; B) Bele iha perturbasaun ba investigasaun ka ba julgamentu, nomeadamente tanba iha perigu ba prova nia akizisaun, konservasaun ka verasidade; ka C) Iha fundadu perigu ba arguidu atu kontinua atividade kriminoza ka ba atu iha perturbasaun ba orden no trankilidade públika tuir krime nia sirkunstánsia ka delinkuente nia personalidade.

PNTL liu husi Servisu Investigasaun Kriminál (SIK) ezekuta mandadu buska no dentensaun husi Tribunál Distritál Díli ho NUK 0016/20/PNSIK no detein Prezidente ANC hodi submete ba prosesu investigasaun no ikus mai submete ba prosesu PI iha TDD.

Arguidu SIK halo dentensaun, tanba deskonfia iha koordenasaun servisu ho arguidu TVB nu’udár jestór prinsipal Telemor no arguidu DP nu’udár Diretór iha empreza Elite Computer, ne’ebé utiliza ekipamentu “Mikroondas ka Microwave” iha tore telekomunikasaun Telemor iha Balibo, hodi simu rede internet husi Atambua-Indonézia ilegalmente no fornese ba liña ministeriál sira, inklui instituisaun PNTL rasik.

MP akuza arguidu ho krime haat mak hanesan Burla Informátika Agravada (269), Fraude Fiskál (314), Korupsaun Pasiva ba aktu ilísitu (292) no krime Administrasaun Danoza (274), hotu-hotu previstu no punidu iha Kódigu Penál Timor-Leste.

Prosesu PI ne’e, prezide husi Juíza, Ercília da Silva, MP reprezenta husi Prokuradór, Matias Soares no arguidu hetan asisténsia legál husi Advogadu Privadu, Manuel Tilman. san

Lee hotu :   PSIK detein suspeitu na’in rua soe bebé iha Ailok-Laran

Add to Comments Here!!!!

error: Content is protected.
Secured By miniOrange
You might also like:
Ema sona negosiante ida iha Taibessi to’o mate

Ernesto dos Santos  idade 24 (vítima),...

PR apela ba Timor-oan sira tenke badinas dezenvolve Timor-Leste

Prezidente Repúblika (PR), Francisco Guterres “Lú...

Udan-anin hafalun komemorasaun loron proklamasaun RDTL ba da-45

Serimonia isar bandeira hodi komemora loron...

Close