Kazu asasinatu Terra Santa, TDD aplika prizaun preventiva ba arguidu LH

Tribunál Distritál Díli (TDD) liu husi prosesu Primeiru Interogatóriu (PI) aplika medida koasaun prizaun preventiva ba arguidu ho inisiál LH, ne’ebé deskonfia uza tudik sona mate Domingas Soares (inan) no hakanek LimDi Moy (oan).

Advogadu privadu Manuel Gonçalves, hateten, razaun tribunál aplika medida koasaun prizaun preventiva, tanba iha indísiu forte arguidu mak oho matebian Domingas Soares no vítima LimDi Moy (matebian nia oan feto) sofre kanek iha liman parte karuk, tanba hetan sona husi arguidu.

“Desizaun ne’ebé tribunál deside ba arguidu LH ne’e prizaun preventiva, tanba bazeia ba artigu 183 Kódigu Prosesu Penál, maibé ha’u husu aprezentasaun periódika, maibé tribunál haree ba sirkunstánsia hotu-hotu, entaun guarda nia ba prizaun preventiva, hodi hein investigasaun kontinuasaun”, Advogadu Privadu, Manuel Gonçalves, iha TDD, Domingu (01/11/2020).

Defeza ne’e mós akresenta, kona-bá violasaun seksual, arguidu LH la komete.

“Tuir nia deklarasaun, nia la halo violasaun seksuál ba lezada. Momentu ne’ebá, tanba nia ta’uk komunidade sira bele sai hodi halo agresaun fíziku ba nia, entaun nia haksoit sai husi janela ne’e mak hetan ain kanek husi parte karuk no ain loos. Defeza haree ba ida ne’e mak sei halo rekursu ba Tribunál Rekursu (TR)”, tenik defeza ne’e.

Ministériu Públiku (MP) akuza arguidu ho krime tentativa omisídiu agravadu, previstu no punidu iha artigu 139 Kódigu Penál no lei númeru 05/2017 kona-bá krime arma branka.

Kazu asasinatu ne’e akontese iha loron 30, fulan Outubru, tinan ne’e, mais ou menus tuku ida ho balun madrugada, iha aldeia Terra Santa, suku Madohi, postu administrativu Dom Aleixo, munisípiu Díli.

Prosesu PI ne’e prezide husi Juíz Singular, Afonso Carmona, MP reprezenta husi Prokuradór, Gustavo da Silva, arguidu hetan asisténsia legál husi Advogadu Privadu, Manuel Gonçalves. San