Konfrontu iha Aileu, rezulta ema na’in tolu kanek

Konfrontu entré joven sira iha aldeia Cirilolo, suku Liurai, postu administrativu  Aileu Villa, munisípiu Aileu, rezulta ema na’in tolu kanek, tanba hetan ta’a husi suspeitu ho inisiál JS.

“Hanesan akontese iha dia 3 de Novembro, tuku 20:20 oras Timor-Leste, akontese joven ida ta’a ema na’in tolu, iha aldeia Cirilolo, suku Liurai, postu administrativu Aileu Villa, suspeitu ne’e ho inisiál JS ho idade 21 anus, suspeitu ne’e komunidade kaer hodi entrega ba iha Polísia, hodi submete ba prosesu investigasaun, oras ne’e detein 72 oras, hodi lori ba tribunál, kauza husi akontesimentu ne’e, tanba sira ba asiste festa kazamentu ida, depois sira fila mai hein malu iha dalan hodi asalta malu”, Porta voz Polísia Nasionál Timor-Leste (PNTL), Superintendente Xefe Arnaldo Araújo, liu husi konferénsia imprensa, Kuarta (04/11/2020), iha Kuartel Jerál PNTL, Caicoli-Díli.

Nune’e mós iha loron 3, fulan ne’e, joven sira baku malu iha Baucau, rezulta ema ida kanek no dau-daun ne’e PNTL detein suspeitu na’in tolu.

Alénde ne’e, membru PNTL ida hetan baku iha Ermera-Hatulia, hafoin halo atuasaun ba problema entre komunidade sira.

Kazu ida fali mak akontese iha Ermera entre família rua iha Hatulia Villa, iha área Timor-Telkom nia oin, ne’ebé rezulta PNTL ida kanek.

“PNTL ba halo atuasaun lori stick hodi dudu ema sira envolve iha problema atu hapara, maibé stick ne’e kona abitante ida nia kaba’as, ho ida ne’e sira sente la satisfeitu hodi tuku membru PNTL ne’e hodi rezulta kanek iha kaba’as, oras ne’e dau-dauk suspeitu ne’e iha ona Polísia Hatulia, hodi hala’o prosesu investigasaun. Nune’e mos, iha loron 3, fulan ne’e mós akontese konfrontu entre joven sira iha munisípiu Baucau, rezulta ema ida kanek kma’an, dau-daun ne’e suspeitu na’in tolu detein ona iha sela, sira seluk forsa Polísia sei buka hela, atu nune’e bele submete ba prosesu investigasaun”, Porta voz PNTL ne’e.

Entretantu Komandante ne’e akresenta, maske akontese kazu sira ne’e, maibé situasaun atuál iha munisípiu Baucau, Aileu, Ermera la’o kontroladu. avi