Lere: Estadu tenke foti medida risidu ba suspeitu kazu ligasaun internet ilegál

Xefe Estadu Maior FALINTIL-Forsa Defeza Timor-Leste (F-FDTL), Major Jeneral Lere Anan Timur, husu Estadu tenke foti medida ne’ebé risidu ba suspeitu kazu ligasaun internet ilegál, tanba aktu ne’ebé komete husi jestór empreza Elite Computer no Telemor hanesan traisaun ba Estadu, hodi halakon Orsamentu Estadu rihun ba rihun.

Lere mós konsidera ligasaun ilegál internet ne’e, la’ós Timor-Leste de’it mak lakon, maibé Indonézia mós lakon.

“Ha’u hanoin katak ita-nia Governu no Estadu tenke toma medida ne’ebé todan ba sira ne’ebé hakarak enfraquese Estadu no Governu. Ne’e mak Governu no Estadu tenke toma medida ne’ebé risidu no ha’u fiar katak la’ós ema estranjeiru de’it, maibé Timor-oan mós envolve ba buat ilegais sira ne’e, sira ne’e mak fasilita, tanba fatór interna hanesan fatór determinante ita nia uma-laran metin ema ida la book ita. Ne’e mak sé for ha’u juíz, ha’u sei fó punisaun ba ema estranjeiru ha’u fó uitoan no ema Timor ha’u fó maka’as ba sira aprende”, Xefe Estadu Maior F-FDTL ne’e hafoin partisipa iha komemorasaun loron proklamasaun independénsia 28 de Novembro ba da-45 iha munisípiu Liquiça, Sábadu (28-11-2020).

Iha loron 23, fulan ne’e, Servisu Investigasaun Kriminál (SIK) Polísia Nasional Timor-Leste (PNTL) detein ona suspeitu TVB iha edifísiu Telemor iha Timor Plaza CBD andar 3 no iha loron hanesan kaptura mós DP iha ninia servisu fatin Colmera, Díli.

Detensaun ne’e halo bazeia ba despaixu Tribunál Distritál Díli, tanba deskonfia komete kazu Burla Informátika no Fraude Fiskál, hodi forñese rede internet ilegál mai Governu no mós PNTL.

Iha loron 24, fulan ne’e, halo buska ba sala sistema sentrál Kompañia Elite Computer iha Colmera-Díli no deside hakotu rede internet, inklui rekolla dadus kliente sira ne’ebé durante ne’e hetan forñesementu internet husi Elite Computer.

No iha loorn 26, fulan ne’e SIK PNTL halo tan detensaun ba Prezidente Autoridade Nasionál Komunikasaun, inklui apreende mós ninia sasan no veíkulu privadu. Iha loron hanesan Tribunál Distritál Díli inísia ona Primeiru Interogatóriu ba suspeitu DP ho TVB. Ministru Transporte no Komunikasaun, José Agostinho da Silva, antes ne’e hateten ona katak nia iha koñesimentu kona-bá ligasaun internet ilegál husi empreza rua ne’e. oct