PNTL kaptura joven na’in haat hakerek panfletu kontra PR Lú Olo

Polísia Nasionál Timor-Leste (PNTL) munisípiu Díli hala’o identifikasaun ba ema na’in haat, tanba loke panfletu kontra Prezidente Repúblika (PR), Francisco Guterres “Lú Olo” iha fatin públiku.

Ema na’in haat ne’e kompostu husi mane na’in rua no feto rua ne’ebé mak PNTL haree ho matan wainhira loke hela panfletu ba juventude sira iha rotunda Francisco Xavier do Amaral, Caicoli-Díli, ne’ebé hala’o hela marsa hodi ba partisipa serimónia komemorasaun 12 de Novembro iha Santa Cruz.

Panfletu ne’e hakerek husi Grupu Movimentu Nasionál Defende Justisa ho kontéudu “Na’i Prezidente Repúblika Povu Terus Tinan Tolu Resin Ona! Parlamentu Nasionál Sobu Malu, Governu Tonka Malu! no Habadak Povu Nia Terus! Keta Haluha Ita Nia Juramentu (Art. 77 K-RDTL).
Segundu Komandante PNTL munisípiu Díli, Superintendente Euclides Belo, hateten, ema hirak ne’e submete ona ba prosesu identifikasaun durante oras 12 iha Polísia.

“Ami bele lee konteúdu jerál, em prinsípiu tendénsia hala’o asaun protestu hasoru PR. Ohin ha’u mak iha lokasi ho Komandante Eskuadra ho ofisiál no ajente sira ami aruma kedas lori ba komando, dau-dauk ne’e sira iha hela prosesu identifikasaun, sé iha tan seluk karik ita sei halo konfirmasaun hodi fó sai ba média”, Segundu Komandante PNTL munisípiu Díli ne’e ba jornalista sira hafoin partisipa serimónia komemorasaun masakre 12 de Novembro, iha Santa Cruz-Díli, Kinta (12/11/2020).

Maske ho akontesimentu refere, Euclides Belo, konsidera aktividade komemorasaun 12 de Novembro la’o kontroladu hahú husi marsa iha Motael mai to’o Santa Cruz, tanba hetan seguransa masímu husi PNTL munisípiu Díli. avi