PNTL rejeita esplika kronolojia kazu Terra Santa

Polísia Nasionál Timor-Leste (PNTL) rejeita esplika rezultadu prosesu investigasaun ba kazu omisídiu iha Terra Santa ne’ebé rezulta Domingas Soares mate, tanba hetan sona ho tudik no ninia oan LimDi Moy hetan sona iha parte liman karuk, husi suspeitu ho inisiál LH.

Wainhira jornalista sira husu kona-bá rezultadu husi prosesu investigasaun ne’e, porta voz PNTL, Superintendente Xefe Arnaldo Araújo, informa, prosesu investigasaun ne’e hala’o tiha ona husi Polísia Servisu Investigasaun Munisípiu Díli, hodi detein ona suspeitu druante oras 72, ikus mai aprezenta ba iha Tribunál Distritál DÍLI (TDD) no aplika medida koasaun prizaun preventiva ba suspeitu.

“Ha’u bele dehan katak, ita hotu hein de’it rezultadu prosesu investigasaun, prosesu investigasaun mak bele esplika kle’an liu kona-bá asuntu ida ne’e, kazu ne’e ita labele haree de’it iha parte no pontu ida. Ha’u hanoin kronolojia fó sai tiha ona munisípiu Díli, ha’u labele repete tan”, Porta voz PNTL ne’e ba jornalista sira liu husi konferénsia imprensa, Kuarta (03/11/2020), iha Kuartel Jerál PNTL, Caicoli-Díli.

Porta voz ne’e akresenta, komando PNTL orienta ona ninia membru hodi hala’o movimentu iha fatin akontesimentu, oinsa bele garante seguransa ba komunidade sira ne’ebé hela iha fatin akontesimentu.

Iha parte seluk, Komandante PNTL Munisípiu Díli, Superintendente Xefe Henrique da Costa, hateten, atuasaun PNTL la haree ba suspeitu nia espoza nu’udár membru Polísia, nune’e sé mak sala kaptura, hodi submete ba prosesu investigasaun.

Tanba ne’e mak suspeitu iha ona prizaun preventiva hodi hein nafatin delegasaun kompeténsia ba PNTL, hodi kontinua loke prosesu investigasaun ba kazu refere.

Entretantu tuir planu matebian Domingas Soares, família sira sei ba halo’ot (hakoi-red) iha postu administrativu Cailaco, munisípiu Bobonaro.

Kazu asasinatu iha Terra Santa ne’e akontese iha loron 30, fulan Outubru, tinan ne’e, mais ou menus tuku ida ho balun madrugada, iha aldeia Terra Santa, suku Madohi, postu administrativu Dom Aleixo, munisípiu Díli. Kona-bá kazu ne’e, deskonfia arguidu ho inisiál LH uza tudik sona mate Domingas Soares (inan) no hakanek LimDi Moy (oan).

Entretantu antes ne’e mós, Tribunál Distritál Díli (TDD) liu husi prosesu Primeiru Interogatóriu (PI) aplika ona medida koasaun prizaun preventiva ba arguidu refere. avi