TL sei asina akordu ho EUA reabilita aeródromu militar Baucau

Governu atribui kompeténsia ba Vise Primeiru Ministru no Ministru Planu no Ordenamentu Teritóriu, José Maria dos Reis asina akordu asisténsia gratuita, entre Governu Timor-Leste ho Estadu Unidus Amérika (EUA) ba projetu re-abilitasaun hamutuk Aeródromu Militar Baucau.

“Konsellu Ministru (KM) delibera atu fó podér tomak ba Vise Primeiru Ministru no Ministru Planu no Ordenamentu Teritóriu, José Maria dos Reis, hafoin koordenasaun ho ministériu relevante sira prosede asinatura akordu asisténsia gratuita entre Governu Timor-Leste no Governu EUA ba projetu re-abilitasaun hamutuk Aeródromu Militár Baucau nian”, Ministru Prezidénsia Konsellu Ministru (MPKM), Fidelis Leite Magalhães, iha Palásiu Governu, Sesta (13/11/2020).

Governante ne’e hatutan, iha komponente ida ne’e alende Vise Primeiru Ministru asina akordu sei lidera ministériu sira atu haree kona-bá inisiativa ne’e ba oin la’o oinsa, tanba komponente ida husi inisiativa ne’e mós atu haree kona-bá Timor-Leste nia seguransa no kualidade ba aeroportu sira, la’ós de’it iha Baucau, maibé Dili, Suai no Oe-Cusse.

Alende ne’e, KM mós aprova projetu deliberasaun ne’ebé aprezenta husi, Ministra Negósiu Estranjeiru no Kooperasaun, Adaljiza Albertina Xavier Reis Magno, atu atribui medalla méritu títulu póstumu ba militár na’in lima husi Repúblika Koreia.

Porta Voz Governu ne’e hatutan, membru batallaun Sul-Koreanu ROKBATT VII, ne’ebé mate iha Timor-Leste iha loron 23, fulan Outubru, tinan 2003, hodi rekoñese no agradese ninia kontributu signikativu ba páz no estabilidade nasionál. cin