Adjuntu Kordenadór MTCI presta deklarasaun iha CAC

Adjuntu Koordenadór Programa Sesta Bázika (KPSB) Ministério Turismo Comerçio e Industria (MTCI) ho inisiál RM, presta deklarasaun iha Comissão Anti Corrupção (CAC), relasiona distribuisaun produtu ba programa sesta bázika.

“Ha’ u mai iha ne’e atu mai konfirma informasaun balun, ha’u tenki fó ba CAC, ida ne’e de’it mak ha’u mai, ha’u labele komentáriu buat barak, tanba buat hotu ohin ha’u ko’alia ona ho parte investigasaun nian, klarifikasaun tuir saída mak ha’u hatene, prosesu sira enkamiña ba para mai presta deklarasaun ida ne’e mak ha’u mai”, Adjuntu KPSB MTCI ne’e hafoin presta deklarasaun iha edifísiu CAC Farol-Díli, Sesta (11/12/2020).

Ekipa CAC halo identifikasaun ba Adjuntu KKPSB MTCI iha Sesta (11/12) ne’e, mais ou menus tuku 09:30 oras Timor-Leste, hodi presta deklarasaun iha edifísiu CAC, relasiona ho distribuisaun produtu ba programa sesta bázika ne’ebé Díli Mart oferese. Investigasaun ne’ebé ekipa CAC hala’o ne’e durante oras tolu resin.

Antes ne’e mós, CAC halo identifikasaun ba jestora Díli Mart na’in rua ho Diretora Aprovizionamentu MTCI Kuarta (09/12) ne’e, iha edifísiu CAC.

Produtu sira ne’ebe Díli Mart atribui ba benefisiáriu sira mak hanesan batar fuhuk, fore no modo-tahan ne’ebé ho ular, inklui kafé falun balun ne’ebé nia kuantidade la tuir lista grama ne’ebé MTCI determina ona. ves