Deskonfia asalta espoza PM Taur, PNTL detein suspeitu na’in haat

Polísia Nasionál Timor-Leste (PNTL) Eskuadra Cristo Rei  detein  mane na’in haat, tanba deskonfia halo asaltu ba kareta espoza Primeiru Ministru (PM), Isabel Ferreira.

Tuir  kondutór ne’ebé mak kondus kareta Avanza privadu, espoza PM, Isabel Ferreira nia kareta ne’e, akontese Kuarta (02/12/20), mais ou menus tuku 06:00 madrugada oras Timor-Leste, wainhira   kondutór  ne’e tula PM, Taur Matan Ruak nia espoza Isabel Ferreira atu ba partisipa misa  iha Bidau, maibé deskonfia hetan asaltu husi  mane na’in rua hamri’ik iha estrada hodi hapara kareta no mane ida tenta baku kareta nia kapon hodi haruka  kondutór loke  odamatan, maibé kareta nia odamatan  xave automatikamente. Tanba ne’e kondutór aranka liu kareta hodi informa ba Polísia Eskuadra Cristo Rei hodi tun kedas ba iha local de crime hodi kaptura mane na’in hitu, hodi halo identifikasaun durante  oras sanulu resin rua, tanba deskonfia envolve mós iha kazu refere.

Maibé durante prosesu identifikasaun Polísia bolu kondutór espoza hodi hakbesik suspeitu sira koñese suspeitu sira ne’e mak Polísia kaptura ona ne’e.

Hafoin ne’e servisu sekreta Polísia Eskuadra hetan informasaun husi fontes balun hodi tun ba iha local de crime hodi husu tuir informasaun, ikus mai deskobre suspeitu sira-nia paradeiru.

Ho ida ne’e, Polísia hetan uluk matadalan ida hodi hatudu suspeitu sira nia paradeiru ida-idak iha sira-nia rezidénsia.

Tanba ne’e, Polísia Eskuadra Cristo Rei, kaptura suspeitu FDA deskonfia autór prinsipál iha Marconi. Hafoin ne’e Polísia kontinua ba kaer tan suspeitu AN iha Ailok-Laran no  suspeitu  DM no OB iha Bidau.

Kondutór, José do Rosário, haktuir, nia koñese suspeitu sira ne’ebé mak halo asaltu kareta Avanza ne’ebé mak nia konduz hodi tula espoza PM, Isabel Ferreira.

“Ha’u koñese sira, tanba ema na’in rua ne’e mak ida isin boot tatto barak ne’e, nia sai husi uma ida mai estrada hodi baku kareta. Ha’u  mak tula ho kareta señora eis primeira dama ne’e atu ba misa iha Bidau Mota-Klaran, entaun ami sai husi uma tun ba sira para tiha kareta hasa’i faru hodi baku kareta nia oin, depois sira hamri’ik iha estrada laran ami liu la di’ak, depois suspeitu sira hakat liu mai estrada liman loos atu loke, maibé odamatan metin hela, entaun señora dehan aselera kareta liu ba sorin de’it, entaun ha’u silu kareta ba liman karuk hodi hala’i liu”, esplika Kondutór ne’e ba GMN iha Eskuadra PNTL Cristo Rei, Kuarta (02/12/2020).

Tuir informasaun husi Polísia, suspeitu na’in haat ne’e posibilidade sei detein oras 72 molok aprezenta ba iha Tribunál Distrital Díli, hodi tuir primeiru interogatóriu. avi