JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Kansela ba Austrália, Traballadór hato’o keixa ba PN

Kansela ba Austrália, Traballadór hato’o keixa ba PN

Kandidatu traballadór ba Austrália kuaze na’in 10 hato’o keixa ba Parlamentu Nasionál (PN), tanba la satisfeitu ho desizaun hosi Sekretáriu Estadu Formasaun Profisionál no Empregu (SEFOPE), ne’ebé kansela sira-nia viajen ba Austrália la ho razaun ne’ebé justu.

Reprezentante kandidatu traballadór, Adão Exposto Ataide Soares, haktuir, nia parte ho kandidatu seluk ne’ebé kansela hosi SEFOPE tuir hotu ona kritéria ne’ebé SEFOPE fó, inklui asina kontratu no halo ona serimónia despedida, maibé SEFOPE kansela, konsidera ho razaun ne’ebé la justu.

“Ami la satisfas de’it, ami hakarak na’i-ulun sira buka atu hadi’ak sistema ida ne’e, tanba sistema ida ne’e ladún di’ak ba futuru. Ami-nia kanselamentu ne’e la klaru mai ami, la fó razaun ida forte, tanba kuandu fó kontratu ne’e tenke hatene, sé hatene ona ami-nia ID ne’e expire ona, labele lori ami atu asina tan kontratu no halo tan serimónia despedida ne’ebé membru Governu, família no Embaixadór sira iha Delta Nova, tanba ne’e ami iha esperansa katak dadersan ami bele aranka ona”.

“Maibé dader SEFOPE telefone dehan ami nain 6 de’it mak mosu iha SEFOPE no ami husu malu, tanba sá mak ita na’in 6 de’it mak mai, sira seluk ba iha ne’ebé, halo ami mós mosu dúvida, maibé SEFOPE sira sai mai esplika dehan  ami labele aranka, tanba ami-nia ID expire ona no hetan kanselamentu hosi governu Austrália. Sé nune’e, oinsa SEFOPE ho governu Austrália liña koordenasaun ba malu, sé hatene ona ami nia ID ne’e expire ona, nusa tenke halo ami okupadu buat oi-oin tan, ne’e katak imi halo moe ona ami, ami la satisfas ho ida ne’e”, kestiona reprezentante kandidatu traballadór ne’e ba jornalista sira iha PN, Sesta (04/12/2020).

Maske nune’e, Adão rejeita informasaun ne’ebé espalla iha públiku katak, razaun kandidatu hirak ne’e lakohi juramentu ba partidu KHUNTO, tanba durante ne’e laiha orientasaun ka obrigasaun ruma.

Alénde ne’e, kandidatu traballadór Leonardino Belo Moniz ne’ebé SEFOPE mós la satisfaz no moe, tanba nia parte sa’e tiha ona aviaun atu ba Austrália, mak foin informa dehan ninia visa mate.

Ho nune’e, nia parte konsidera akontesimentu ne’e, tanba fallansu no frakeza falta koordenasaun SEFOPE nian, nune’e SEFOPE tenke responsabiliza.

“Dokumentu atu ba Austrália ne’ebé ami kaer no pasaporte de’it, maibé dokumentu seluk SEFOPE mak ka’er hotu, até billete de’it mós ami la hetan, SEFOPE promete mai ami dehan ba aeroportu mak ami bele foti. Depois to’o aeroportu ami simu dokumentu ne’e, tama liu ba Checking, iha ami na’in 4 mak hetan kansela iha aeroportu, maibé ha’u sa’e tiha ona iha aviaun laran, na’in 3 seluk ne’e sasán mak ba tama tiha ona iha bagasi, razaun mak dehan visa mate”.

“Ha’u la satisfas mak sa’e tiha aviaun mak foin dehan visa mate, sedangkan dokumentu hirak ne’e SEFOPE mak trata hotu, eseptu ami mak trata rasik hanesan ba Irlándia ne’e karik oin seluk, maibé ba Austrália ne’e sira SEFOPE mak trata tiha, tuir loloos dokumentu saída de’it, inklui visa atu mate ka moris ne’e SEFOPE hatene antes ona, tanba ida ne’e servisu hamutuk entre Estadu nasaun rua”, afirma nia.

Kandidatu traballadór ne’e haktuir, piór liu-tan visa sei válidu até tinan 2022. tanba ne’e lamentavel ho kanselamentu refere.

“Visa ne’ebé mak hau ka’er ne’e sei moris hela 2022 mak foin mate, dehan iha Austrália nia mak ha’u nia visa mate, ida ne’e la justu mai ha’u, to’o tiha aviaun laran mak hatun fali ha’u ne’e mak ha’u la simu”. Servisu iha SEFOPE laran ne’e sei mosu fallansu barak no laiha koordenasaun di’ak, tanba ne’e mak mosu hanesan ne’e, tanba sira-nia servisu la han malu, entre kontratu nian no trata dokumentu nian, maibé Timor-oan sira labele sai vítima bei-beik ba sistema sira ne’ebé mak falla hosi SEFOPE”, esplika Leonardino.

Kazu ne’e akontese ba kandidatu traballadór kuaze na’in 10, na’in 6 kansela iha SEFOPE antes desloka no nain 3 kansela bainhira to’o iha aeroportu no na’in 1 seluk hetan kanselamentu bainhira iha ona aviaun laran. say

Lee hotu :   MD PRONTU DEZENVOLVE F-FDTL

Add to Comments Here!!!!

error: Content is protected.
Secured By miniOrange
You might also like:
PNTL detein komunidade fa’an fugetes

Polísia Nasionál Timor-Leste (PNTL) liu husi...

Governu viola lei jestaun finanseira, CNRT walk out iha diskusaun OJE espesialidade

Liu husi inísiu diskusaun faze espesialidade...

Ema ho défisiénsia 25% seidauk asesu ba edukasaun

Diretór Ezekutivu Asosiasaun Defisiénsia Timor-Leste (ADTL),...

Close